ترەمپ دەیەوێت لە عێراقەوە ئێران جڵەو بکات

ئاڤا نیوز

 

دۆناڵد ترەمپ، سەرۆکی هەڵبژێردراوی ئەمریکا دەیەوێت لە ڕێگەی عێراقەوە جڵەوی ئێران بکات و هەموو ئەو ڕێگایانە لە ئێران قەدەغە بکات کە لە عێراقەوە چەک بۆ سووریا و لوبنان دەنێرێت.

 

وێنە گەورەکە: یەکەم هەنگاوی جڵەوکردنی ئێران ئەوەیە کە ترەمپ دەیەوێت عێراق لە ئێران قەدەغە بکرێت، تاوەکو ئێران نەتوانێت لە ڕێگەی عێراقەوە نەوتەکەی بگوزێتەوە، هاوکات ئێرانیش لەڕێگەی بانکەکانی عێراق دۆلاری دەستنەکەوێت.

 

لێدوانی فەرمی: سەرچاوەیەک کە نەیویستووە ناوی ئاشکرا بکرێت بە ئاژانسی عەرەبییەی ڕاگەیاندووە، ترەمپ و یاریدەدەرانی سوورن لەسەر بەرپەرچدانەوەی ئێران، یەکەم هەنگاویشیان قەدەغەکردنی عێراقە لە ئێران تاوەکو نەوتی تێدا نەگوازێتەوە و بانکەکانی عێراقیش بەکارنەهێنێت تاوەکو دۆلاری تێدا دەست کەوێت. 

 

هاوکات بابەتێکی دیکە کە بەلای ترەمپەوە گرنگە، قەدەغەکردنی ناردنی چەک و تەقەمەنییە لە ئێرانەوە بۆ عێراق و لەوێشەوە بۆ سووریا و لوبنان. 

 

زانیاریی زیاتر: ئەگەر بابەتی چەک و تەقەمەنی چارەسەر نەکرێت، ترەمپ ڕێگا بە ئیسڕائیل دەدات بۆ فراوانکردنی هێرشەکانی دژ بە ئێران و چەکدارەکانی.