ڕێباز حەملان لە پۆستی بریکاری وەزارەتی دارایی عێراق دەستبەکاردەبێت

ئاڤا نیوز

 

ڕێباز حەملان، یاریدەدەری پێشووتری سەرۆکوەزیران مەسرور بارزانی بۆ کاروباری دارایی و ئابووریی، لە پۆستی بریکاری وەزارەتی دارایی عێراق دەستبەکاربوو و بەشداری کۆبوونەوەکانی وەزارەتەکەی کرد.

 

وێنە گەورەکە: ناوەڕاستی ئەم مانگە ڕێباز حەملان بە فەرمی بۆ پۆستی بریکاری وەزارەتی دارایی عێراق دیاریکرا، تا شوێنی مەسعوود حەیدەر بریكاری پێشووی وەزارەتەکە بگرێتەوە.

 

ڕاگەیێنراوی فەرمی: وەزارەتی دارایی عێراق بڵاویکردەوە، تەیف سامی، وەزیری دارایی بە ئامادەبوونی ڕێباز حەملان بریکاری وەزارەتی دارایی سەرۆکایەتی کۆبوونەوەی دەستەی بۆچوونی کردووە کە بەڕێوەبەری گشتی فەرمانگەکان، بانکەکان، دەستەکان و کۆمپانیاکانی سەر بە وەزارەت تێیدا ئەندامن.

 

لە کۆبوونەوەکەدا باس لەو ڕێکار و بڕیارانە کراوە کە پێویستە بگیرێنەبەر بۆ باشترکردنی کاروباری وەزارەتی دارایی و نوێکردنەوەی پەیکەری بەڕێوەبردنی دارایی دامەزراوەکان، جەختیشکراوەتەوە لەسەر گەشەپێدانی کەرتی بانکی و بە ئەلیکترۆنیکردنی کارووبارەکان، ئەویش بە ئامانجی باشتر خزمەتکردنی هاووڵاتیان.