بڕیارە ئەمڕۆ پەرلەمانی عێراق دەنگ لەسەر چەند یاسایەکی کێشەلەسەر بدات

ئاڤا نیوز

دوای چەندین جار دواخستنی دەنگدان لەسەر سێ پڕۆژە یاسای گرنگ، بڕیارە ئەمڕۆ پەرلەمانی عێراق دەنگ لەسەر پڕۆژە یاساکانی،' گەڕاندنەوەی خاوەندارێتی موڵک و ماڵی داگیرکراو لە ناوچەکانی دەرەوەی ئیدارەی هەرێمی کوردستان، هەمواری یاسای باری کەسیی و هەموارکردنەوەی یاسای لێبووردنی گشتی بدات. 

 

وێنە گەورەکە: یەکێک لە دیارترین ئەو پڕۆژە یاسایانەی ئەمڕۆ پەرلەمانی عێراق خوێندنەوەی دووەمی بۆ دەکات هەمواری یاسای باری کەسییە، هەموارەکە پێشتر ناڕەزاییەکی فراوانی لە ئاستی ناوخۆیی عێراق و دامەزراوە نێودەوڵەتییەکانی بواری مافەکانی ژنان و مافی مرۆڤ لێکەوتووەتەوە و بە پێشێلکردنی مافی ژنان ناوی دەبەن. لەبارەی هەمواری ئەو یاسایە، کێشەیەکی زۆر لەنێوان لایەنە کوردستانییەکان و سوننە لەگەڵ شیعە هەیە و ئەمڕۆ دەخرێتە دەنگدانەوە.

 

ڕاگەیێنراوی فەرمی: بەپێی نووسینگەی پەرلەمانی عێراق، بڕیارە ئەمڕۆ یەکشەممە کاتژمێر 01:00ی پاش نیوەڕۆ پەرلەمانی عێراق کۆ دەبێتەوە بۆ دەنگدان لەسەر ئەم بڕگانە:

 

 یەکەم: دەنگدان لەسەر پرۆژەیاسای هەمواری یاسای باری کەسیی.

دووەم: دەنگدان لەسەر پرۆژە یاسای گەڕاندنەوەی خاوەندارێتی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە.

سێیەم:  هەموارکردنەوەی یاسای لێبووردنی گشتیی ژمارە 27ی ساڵی 2016ـەیە.

چوارەم: خوێندنەوەی دووەم بۆ ڕەشنووسی یاسای فڕۆکەوانی مەدەنی.

پێنجەم:  خوێندنەوەی دووەم بۆ هەمواری یاسای شاری پیشەسازی.