ڕابن ژ خەوێ؛ سەکۆیەک بۆ گەیاندنی کێشەکانی خەڵک لە بادینان

ئاڤا نیوز

"ڕابن ژ خەوێ" بەرنامەیەکیی ڕادیۆی ئاڤا بەهدینانە و بووەتە زەنگێکی ڕۆژانەی بەیانیان بۆ خەڵکی ئەو دەڤەرە و سەکۆیەک بۆ گەیاندنی کێشەکانیان.

چیرۆکی سەرەکی: ڕابن ژخەوێ لەلایەن هەردوو ئەکتەری ناسراوی بەهدینان خەلۆ و جەلۆ پێشکەش دەکرێت و ڕۆژانە دەیان پەیوەندی و کێشەی خەڵک بە لایەنە پەیوەندیدارەکان دەگەیێنن.

ئەوەی پێویستە بیزانیت: ئەم بەرنامەیە نزیکەی نۆ مانگە پێشکەش دەکرێت و ئێستا جگە لە هاونیشتمانیان بەرپرسانی دەڤەری بەهدینانیش بوونەتە گوێگری بەرنامەکە و خەلۆ و جەلۆ ڕۆژانە لەگەڵ وەرگرتنی کێشە و پەیامی هاونیشتمانیان، یەکێک لە بەرپرسەکانیش دەکەنە میوان و ڕاستەوخۆ کێشەی خەڵکیان پێ دەگەیێنن.

ژمارەکان وادەڵێن: تەنیا لە مانگی ڕابردوودا بەرنامەی ڕابن ژخەوێ 200 پەیوەندی هاونیشتمانیانی وەرگرتووە، لەو ژمارەیەش 14 پەیوەندی بەرپرسە ئیدارەییەکانی پارێزگای دهۆک و 153 لەو پەیوەندیانە کێشەی هاونیشتمانیان بووە و بە لایەنی پەیوەندیدار گەیێنراون، 20 کێشەش چارەسەرکراون و بەڵێنی چارەسەرکردنی هەموو کێشەکانی دیکەش وەرگیراوە.

جگە لەمەش لە مانگی ئاداری ساڵی ڕابردووەوە تاوەکو ئێستا کە بەرنامەکە پێشکەش دەکرێت، هەزار و 848 پەیوەندی وەرگیراوە و لەوانەش هەزار و 398 پەیوەندی کێشەی هاونیشتمانیان بووە و هەزار و 10 کێشە گەیێنراونەتە لایەنی پەیوەندیدار و زیاتر لە 130 کێشەش بە تەواوی چارەسەر کراون.

خاڵی ئەرێنی: خەلۆ جەلۆ جگە لە گەیاندنی کێشەی خەڵک بوونەتە جێگەی دڵخۆشکردنی هاونیشتمانیان و ڕۆژانە بە قسەی خۆش و بەسەرهات گفتوگۆ لەگەڵیان دەکەن. ئێستا ڕابن ژ خەوێ بەتەواوەتی توانیویەتی بچێتە ناو خەڵکەوە و شوێن پەنجەی لە گەیاندن و چارەسەرکردنی کێشەکانی هاونیشتمانیاندا دیارە و بووەتە کلیلی چارەسەر و دەنگ و ڕەنگی خەڵکی دەڤەری بەهدینان.