نرخی دەرمان لە ئێران بەرز دەبێتەوە؛ پزیشکیان هەوڵی چارەسەری خێرای دەدات

ئاڤا نیوز

مەسعود پزیشکیان، سەرۆککۆماری ئێران دەڵێت بەرزبوونەوەی نرخی دەرمان لەسەر حیسابی گیرفانی هاووڵاتیان هێڵی سوورە و ڕێگری لێدەکەم.

چیرۆکی سەرەکی: ماوەی زیاتر لە چوار مانگ دەبێت بەرزبوونەوەی نرخی دەرمان و کەمبوونەوەی  لە ئێران دروستبووە بە ڕادەیەک کە هاووڵاتیان ناچارن بۆ نەخۆشی زۆر قورس نەبێت ڕوو لە نەخۆشخانە و دەرمانخانەکان نەکەن، بۆ ئەم بابەتە مەسعود پزیشکیان دەڵێت، هەوڵی جددی دەدەین بۆ چارەسەرکردنی ئەم کێشەیە.

بڵاوکراوەی فەرمی: سەرۆککۆماری ئێران لە پەیامێکدا لە تۆڕی کۆمەڵایەتی ئێکس نووسیویەتی: داوا لە هاوکارانم دەکەم تا زووە ڕێگری لەم کارەساتە بکەن و چارەسەرێکی بۆ بدۆزنەوە.

ئەم قسانەی پزیشکیان لە کاتێکدایە کە ئەحمەد ئاریانەژاد، ئەندامی کۆمسیۆنی تەندروستی لە پەرلەمان ئێران لەم هەفتەیەدا ڕایگەیاند، لەگەڵ زیادبوونی تێچووی دەرمان و سەردانی پزیشک، هەندێک لە هاووڵاتیان کە توانای دارایی سنوورداریان هەیە، خۆیان لە چوون بۆ لای پزیشک و بەکارهێنانی دەرمان بەدوور دەگرن و ناچارن یان مامەڵە لەگەڵ نەخۆشییەکەیان بکەن یان ڕوو لە بەکارهێنانی دەرمانی گیایی بکەن.

لەلایەکی دیکەوە: محەممەد ڕەزا زەفەرقەند، وەزیری تەندروستی ئێران ڕایگەیاند: بۆ چارەسەری کەمبوونەوەی دەرمان لە وڵاتدا، پێویستە لەژێر چاودێری یاسایی زەوی بۆ چاندنی تلیاک و خەشخاش دابین بكرێت بۆ دەستكەوتنی بەشێك لە دەرمان، ئەم بڕیارەش لە کاتێکدایە کە لە سەرەتای ئەمساڵەوە بڕی 9.7 ملیار دۆلار بۆ هاوردەکردنی کاڵای پێویستی و دەرمان تەرخان کراوە.