بەرگریی شارستانی: ئەو سێ كۆگایەی لە هەولێر سووتان مۆڵەتی سەلامەتییان نەبووە

ئاڤا نیوز

وتەبێژی بەرگریی شارستانیی هەولێر ڕایدەگەیێنێت، ئەو سێ كۆگایەی لە هەولێر سووتان، مۆڵەتی بەرگریی شارستانیان بۆ ڕەچاوكردنی مەرجەكانی سەلامەتی نەبووە و تەنانەت لە بەڕێوەبەرایەتیەكە تۆمار نەكراون، بەرپرسی بەشی چاودێریكردن و بەدواداچوونی دەرمانیش دەڵێت، دڵنیابوونەوە لە دەرهێنان و نوێكردنەوەی مۆڵەتی بەرگریی شارستانی لە كۆگاكانی دەرمان، كاری ئێمە نییە، بەڵكو ئەركی بەڕێوەبەرایەتیی گشتیی تەندروستیی هەولێرە.

چیرۆکی سەرەکی: بەرەبەیانی ڕۆژی چوارشەممە 19-11-2025، لەسەر ڕێگای سەرەکیی هەولێر – گوێر، سێ كۆگای هەڵگرتنی دەرمان و كەلوپەلی پزیشكی كە خاوەنی كۆگاكان خەڵكی وڵاتێكی عەرەبییە، ئاگریان گرت. 10 تیمی بەرگریی شارستانی، دەستبەجێ گەیشتنە شوێنی ڕووداوەكە و توانییان لەماوەی یەک کاتژمێر ئاگرەكە كۆنترۆڵ بكەن.

لێدوانی فەرمی: مقەدەم شاخەوان سەعید، وتەبێژی بەرگریی شارستانیی هەولێر بە ئاڤای ڕاگەیاند، "بەپێی ڕێكارەكان، مۆڵەتی هیچ شوێنێكی بازرگانی و كۆگایەك نوێ ناكرێتەوە بەبێ هەبوونی مۆڵەت و ڕێگەپێدانی بەرگریی شارستانی، ئەو كۆگایانەی ئاگریان لێكەوتەوە، تەنانەت تاكو ئێستا لەلای ئێمە تۆمار نەكراون و هیچ مەرجێكی سەلامەتیش لەو شوێنە نەبووە، بۆیە سێ كۆگا بەتەنیشت یەكترەوە بەبێ مۆڵەتی بەرگریی شارستانی، جێی تێڕامان و پرسیارە."

مەترسی پێشبینیكراو: ئەگەر تیمەكانی بەرگریی شارستانی زوو فریای ئاگرەكە نەكەوتبوونایە، لەو شوێنە چوار هەزار كۆگای دیكە هەن، ئەگەری سووتانی لانیكەم 100 كۆگای دیكە دەكرا.

لەلایەكی دیكەوە: د. گۆڤەند ڕەوەند، بەپرسی بەشی چاودێریکردن و بەدواداچوونی دەرمان بە ئاڤای وت، "لە چوارچێوەی سەردانە ڕۆتینیەكانی خۆمان بۆ پشكنینی كۆگاكانی هەڵگرتنی دەرمان، بەر لە مانگێك ئەو كۆگایەمان پشكنی، بەڵام پشكنینی مەرجی سەلامەتی كۆگاكە ئەرك و تایبەتمەندی ئێمە نییە وەكو بەشی چاودێریكردن و بەدواداچوونی دەرمان، بەڵكو لیژنەیەكی بەڕێوەبەرایەتیی گشتیی تەندروستیی هەولێر لێی بەرپرسن كە پێویست بوو لەكاتی نوێكردنەوەی مۆڵەت، كۆگاكە پابەند بكات بە ڕەچاوكردنی مەرجەكانی سەلامەتی."

ئاماژەی بەوەشكرد، كۆگا سووتاوەكان، ئەو كەرەستە و ماددانەی تێدابووە كە بۆ جێبەجێكردنی مەرجەكانی سەلامەتی پێویستن، بەڵام زانیاریمان لە جۆر و بڕی ئەو ماددە و كەرەستانە نییە كە بیمەی سەلامەتیی شوێنەكە دەكەن، بەوپێیەی لەچوارچێوەی شارەزایی ئێمە نییە."

د. گۆڤەند ڕوونی كردەوە، بەنموونە؛ جۆری ئەو پاودەرەی بۆ كوژاندنەوەی ئاگر لە كۆگاكان هەبووە، جۆری كلاسیكە و بەو بڕ و جۆرە ناتوانرێت ئاگرێكی لەمجۆرە فراوانە بكوژێنرێتەوە، تەنانەت هەر لەگەڵ ئاگركەوتنەوەكە، بوتڵی كوژاندنەوەی ئاگرەكەش تەقیبوون، وە ناشزاندرێت پاودەری ئاگركوژێنەوەكە ئێكسپایەر بووە یاخود نا، ئەوە ئەركی بەرگریی شارستانییە."

زانیاریی زیاتر: كۆگا سووتاوەكان، ساردكەرەوەی هەڵگرتنی هەموو جۆرە دەرمانەكانی هەبووە، ژووری تایبەتی بە دەرمانە ماوەبەسەرچووەكان هەبووە، ناوی كۆگاكە زۆر كارایە و بەردەوام نووسراوەكانی كەوتووەتە بەرچاوی دامودەزگا تەندروستییەكان، بۆیە گومانی ئەوەی لێ نەدەكرا، پابەندی مەرجی سەلامەتی نەبووبێت.

بەشی چاودێریكردن و بەدواداچوونی دەرمان، بێ ئاگایی خۆی لە هەبوونی مۆڵەتی بەرگریی شارستانیی كۆگان دەربڕی، گوایە ئەو بابەتە، لە سنووری ئەركی ئەوان نییە و لیژنەكانی بەڕێوەبەرایەتیە گشتییەكانی تەندروستیی پارێزگاكان ڕاپۆرتی خۆیان لەبارەی نوێكردنەوەی مۆڵەتی شوێنە بازرگانییەكان و كۆگاكان بەرز دەكەنەوە بۆ وەزارەتی تەندروستی و وەزارەتیش لەسەر بنەمای ئەو ڕاپۆرتە، مۆڵەتی پێ دەدات.

بەرپرسی بەشی چاودێریكردن و بەدواداچوونی دەرمان وتیشی، پێویستە كۆمپانیاكان پابەندبن بە بەكارهێنانی ئاگركوژێنەوەی جۆری مۆدێرن، ئەو جۆرەی كە بە سیستەمی كارەبای ناو كۆگا و شوێنە بازرگانییەكان بەستراونەتەوە.

ئەوەی پێویستە بیزانیت: بەپێی ستانداردی جیهانی، كۆگاكانی هەڵگرتنی دەرمان پێویستە ئەو مەرجانەی سەلامەتییان تێدابێت:

یەكەم: پێویستە نێوانی هەر جۆرە كەرەستەیەك و جۆرێكی دیكە، بەتاڵ بێت و چەند مەترێك لەیەكترەوە دوور بن. واتە ڕەچاوی جۆری كۆگاكردنی هەر كەرەستە و دەرمانێك بكرێت.

دووەم: دیوار و بنمیچەكانی لە ماددەی دژەئاگر دروستكرابێت.

سێیەم: سیستەمی ڕشاندنی ئۆتۆماتیكی تێدابێت.

چوارەم: هەبوونی سیستەمی زەنگی ئاگاداركردنەوە و بەدیكردنی دووكەڵ.

پێنجەم: هەبوونی سیستەمی ئاگركوژێنەوەی دەستی (سندوقی).