شانەی ئەمنیی عێراق: بۆ هەر پێشهاتێک هەماهەنگیمان لەگەڵ پێشمەرگە هەیە

ئاڤا نیوز

 

شانەی ئەمنیی عێراق دڵنیایی دەدات کە گرووپە چەکدارەکان ناتوانن ئاسایشی وڵات تێکبدەن و دەڵێت، بۆ هەر پێشهاتێک لەگەڵ هێزەکانی پێشمەرگە پلان و ڕوانگەی هاوبەشیان هەیە.

 

وێنە گەورەکە: ئاڵۆزی دۆخی سووریا دەسەڵاتدارانی عێراقی نیگەرانکردووە بەتایبەت مەترسی ئەوەیان هەیە گرووپە چەکدارەکان بۆ عێراقیش بپەڕنەوە، بۆیە ئاسایشی سنوورەکان لەگەڵ سووریا توندترکراوە و هێزە عێراقییەکان لە ئامادە باشیدان.

 

لێدوانی فەرمی: لیوا تەحسین خەفاجی، سەرۆکی شانەی ڕاگەیاندنی ئەمنیی بە ئاژانسی فەرمی عێراقی ڕاگەیاندووە، فەرماندەیی ئۆپەراسیۆنەکان و هێزەکانی پێشمەرگە هەماهەنگییەکی باش و بەردەوامیان هەیە و سەبارەت بە بڵاوەپێکردنی هێزە ئەمنییەکانیش بڕیارەکانی سوودانی وەک خۆیان جێبەجێکراون.

 

ئەوەشی خستووەتەڕوو، لە مانگێکدا 23 ئەندامی داعش کوژراون و هیچ شوێنێک نییە کە هێزە ئەمنییەکان پێی نەگەن، جەختیش دەکاتەوە کە گرووپە تیرۆریستییەکان چیتر ناتوانێت ئاسایشی وڵاتەکەی تێکبدەن.