مونا قەهوەچی: پۆستێکمان لە سەرۆکایەتیی پەرلەمان دەوێت

ئاڤا نیوز

 

پارتی چاکسازیی تورکمان پاکێجی بەشداریکردنی لە کابینەی  دەیەمی حکومەتی هەرێمی کوردستان ئامادەکردووە و یەکێک لە پۆستەکانی دەستەی سەرۆکایەتیی پەرلەمان یەکێک لە داواکارییە سەرەکییەکانیانە.

 

وێنە گەورەکە: پێکهاتەکان پێنج کورسییان لە خولی شەشەمی پەرلەمانی کوردستان هەیە، جیاواز لە خولەکانی ڕابردوو ئاڕاستە و داواکاریی جیاوازیان هەیە، پاکێجی تایبەت بەخۆیان بۆ بەشداریکردن لە حکومەتی نوێ هەیە. پارتی چاکسازیی تورکمان کە لە خولی ڕابردوو پۆستی سکرتێری پەرلەمانیان لابوو، لەم خولەش یەکێک لە داواکارییەکانیانە.

 

لێدوانی فەرمی: مونا قەهوەچی، جێگری سەرۆکی پارتی چاکسازی تورکمان و کاندیدی دەرچووی تورکمان لە هەولێر بە ئاڤا نیوزی گوت، "وەک لایەنی براوەی تورکمانەکان پۆستێک لە دەستەی سەرۆکایەتی پەرلەمان، یاریدەدەری سەرۆکی هەرێم یان وەزارەتێک لە سەرووی داواکارییەکانمانە و بە مافی خۆمانی دەزانین."

 

ئەوەی پێویستە بیزانیت: لە هەڵبژاردنی خولی شەشەمی پەرلەمانی کوردستان، لە کۆی 100 کورسی پێنج کورسی بۆ پێکهاتەکان دیاریکرا، سێ کورسی بۆ  پێکهاتەی کریستیان و دوو کورسی بۆ تورکمانەکان، بەسەر سێ پارێزگادا دابەشکران، دوو بۆ هەولێر، دوو بۆ سلێمانی و یەکێک بۆ دهۆک.