ئەو کاندیدە دیارانەی ناچنە پەرلەمان ئەمڕۆ سوێندی یاسایی دەخۆن

ئاڤا نیوز 

 

گومانی بەشداریکردنی بەشێک لە کاندیدە دەرچووەکانی لایەنەکان لە پەرلەمان هەیە، بەڵام هەندێکیان ئەمڕۆ سوێندی یاسایی دەخۆن، دواتر دەکشێنەوە و شوێن بە کاندیدێکی دیکەی لیستەکەیان دەدەن.

 

وێنە گەورەکە: بەگوێرەی پەیڕەوی ناوخۆی پەرلەمان هەر کاندیدێکی دەرچوو لە ماوەی یەک مانگدا ڕێکاری سوێندخواردن جێبەجێ نەکەن کاندیدی دیکە شوێنیان دەگرێتەوە، بەو مەرجەی لە هەمان لیست و بازنە بێت و لە نێو یەدەگەکاندا زۆرترین دەنگی هەبێت.

 

ئەوەی پێویستە بیزانیت: هەریەک لە لاهوور شێخ جەنگی، سەرۆکی لیستی بەرەی گەل لە بازنەی سلێمانی؛ شاڵاو کۆسرەت ڕەسوڵ، سەرۆکی لیستی یەكێتی بازنەی هەولێر؛ د.میران محەممەد، سەرۆکی لیستی یەکێتی لە بازنەی سلێمانی و هەڵگورد شێخ نەجیب کاندیدی پارتی لە بازنەی هەولێر دیارترین کاندیدی دەرچووی لایەنەکانن کە بە هۆکاری جیاواز نابن بە پەرلەمانتار، جگە لە لاهوور شێخ جەنگی ئەوانی دیکە ئەمڕۆ سوێندی یاسایی دەخۆن.

 

زانیاریی بەدەستهاتوو: کاندیدە دەرچووەکانی یەكێتی لە پێش بەشداریکردن لە دانیشتنی ئەمڕۆی پەرلەماندا لە بارەگای مەکتەبی سیاسیی حیزبەکە لە هەولێر کۆبوونەوە، دواتر پێکەوە هاتنە نێو هۆڵی پەرلەمان و بەشداری دانیشتنەکە دەکەن.

 

لەلایەکی دیکەوە: بەرپرسێکی باڵای بەرەی گەل بە ئاڤای ڕاگەیاند، "لاهوور شێخ جەنگی بەشداری دانیشتنەکە ناکات و ناچێتە نێو پەرلەمان، لە بری ئەو کاندیدێکی دیکەی بەرەی گەل لە بازنەی سلێمانی دەبێتە پەرلەمانتار."