سەرۆک بارزانی و شێخی ئەزهەر تاوتوێی مەترسییەکانی سەرهەڵدانەوەی تیرۆر دەکەن

ئاڤا نیوز

 

سەرۆک بارزانی پێشوازی لە شاندی باڵای زانایانی ئاینی ئەزهەر لە پیرمام کرد، هەروەها مەترسییەکانی تیرۆر و بیری توندڕەوی و پاراستنی ئارامی ناوچەکەیان تاوتوێ کرد.

 

وێنە گەورەکە: ئەمڕۆ 2-12-2024، سەرۆک بارزانی پێشوازی لە شێخی ئەزهەر و شاندی یاوەری لە پیرمام کرد.

ڕاگەیێنراوی فەرمی: بارەگای بارزانی بڵاویکردەوە: سەرۆک بارزانی لەگەڵ د.عەباس شومان ئەمینداری گشتیی دەستەی گەورە زانایانی ئەزهەر و د.سەلامە داود سەرۆکی زانکۆی ئەزهەر و وائیل بەخیت جێگری سەرۆکی ڕێکخراوی جیهانی دەرچووانی زانکۆی ئەزهەر و ئەحمەد فەوزی بەڕێوەبەری کار و کاروباری دەرەوەی زانکۆی ئەزهەر لە پیرمام کۆبوونەوە.

 

بەگوێرەی ڕاگەیێنراوەکە، شاندەکەی زانیانی ئەزهەر ستایشی ئارامی و پێشکەوتنەکانی هەرێمی کوردستان و پێکەوەژینی ئاین و نەتەوە جیاوازییەکانیان کرد، بە نموونەیەکی سەرکەوتوو لە ناوچەکەدا ناوزەندیان کرد.

 

لەلایەکی دیکەوە: سەرۆک بارزانی پەیوەندییە مێژووی و دۆستایەتییەکانی نێوان هەردوو گەلی کوردستان و میسری خستەڕوو، هاوکات هیوای خواست پەرە بە پەیوەندییەکان بدرێت، بەتایبەت لە ڕووی ئەکادیمی و هەماهەنگی و هاوبەشی لەگەڵ ناوەندە ئاینی و زانستییەکانی زانکۆی ئەزهەر. 

 

ئەوەی پێویستە بیزانیت: مەترسییەکانی سەرهەڵدانی تیرۆر و بیری توندڕەوی و پاراستنی ئارامی ناوچەکە و گۆڕانکاری و ئاڵۆزییەکانی ڕۆژهەڵاتی ناوەڕاست تەوەرێکی دیکەی گفتوگۆکان بوو.