حکومەتی عێراق لە ڕێگەی ئاڤا میدیاوە وەڵامی داواکارییەکەی حکومەتی کاتی سووریا دەداتەوە

ئاڤا نیوز

 

حکومەتی عێراق ڕەتیدەکاتەوە مامەڵە لەگەڵ حکومەتی "ڕزگاری" سووریا بکات و دەڵێت، هەر بەناو حکومەتێک کە گرووپە چەکدارەکان دروستی بکەن بەغدا مامەڵەی لەگەڵدا ناکات و وەک هەڕەشە لەسەر وڵاتەکەشی دەیبینێت.

 

وێنە گەورەکە: دوێنێ حکومەتی ڕزگاری سووریا کە لەلایەن دەستەی تەحریر شامەوە سەرپەرشتی دەکرێت و ئەرکی بەڕێوەبردنی ناوچە کۆنتڕۆڵکراوەکانی ئیدلب و حەلەب و حەمایە، دڵنیایی بە دەسەڵاتدارانی بەغدا دا و ڕایگەیاند، حکومەتەکەیان نابێتە هەڕەشە لەسەر عێراق.

 

لێدوانی فەرمی: سەبهان مەلا جیهاد، ڕاوێژکاری کاروباری سیاسیی سەرۆکوەزیرانی عێراق بە ئاڤا میدیای راگەیاند، حکومەتی عێراق هیچ گرنگییەک بە نامەکەی حکومەتی "ڕزگاری" سووریا نادات و ئەو گرووپانە لە لیستی تیرۆردان بۆیە مامەڵەیان لەگەڵدا ناکەن، باوەڕیشیان وایە ئەو گرووپانە مەترسین لەسەر ئاسایش و ئارامی عێراق.

 

ڕاوێژکاری کاروباری سیاسیی سەرۆکوەزیرانی عێراق باسی لەوەشکرد: "عێراق گرنگی بە دۆخی سووریا دەدات بەهۆی ئەوەی کاریگەریی ڕاستەوخۆی لەسەر دۆخی عێراق دەبێت، بۆیەش چاودێریی هەموو گۆڕانکارییەکانی ئەو وڵاتە دەکەین و ئامادەشین بۆ هەر حاڵەتێکی لەناکاو کە لەوانەیە لە قۆناغی داهاتوو ڕووبدات."