نزیکەی 50%ی پرۆژەی فریاگوزاریی خێرای ئاوی هه‌ولێر تەواو دەبێت

ئاڤا نیوز 

 

کارەکانی پرۆژەی فریاگوزاریی خێرای ئاو بۆ هەولێر بەباشی بەڕێوەدەچێت و کۆمپانیای جێبەجێکاریش هەوڵ دەدات بەر لە وادەی خۆی پرۆژەکە تەواو بکات.

 

وێنە گەورەکە: کەمتر لە سێ مانگە بەردی بناغەی پرۆژەی فریاگوزاریی خێرای ئاوی هەولێر لەلایەن سەرۆکوەزیران مەسرور بارزانی دانراوە و نزیکەی 40% بۆ 50% کارەکانی پرۆژەکە تەواو کراون.

 

لێدوانی فەرمی: ئیسماعیل بارزانی، سەرپەرشتیاری ئیداریی پرۆژەی فریاگوزاریی خێرای ئاوی هەولێر بە ئاڤا نیوزی ڕاگەیاند: لە چەندین شوێن و قۆناغی جیاوازەوە پرۆژەکە کاری تێدا دەکرێت، هاوکات لە هەوڵداین بەر لەوادەی دیاریکراوی خۆیدا پرۆژەکە جێبەجێ بکرێت.

 

لەلایەکی دیکەوە: بەگوتەی سەرپەرشتاری ئیداریی پرۆژەکە لە 50% بۆرییەکانی گواستنەوەی ئاو دانراون، هاوکات دانانی بۆرییەکانی پرۆژەکە گەیشتووەتە شەقامی 120 مەتریی هەولێر و لە ماوەی داهاتووشدا دەگەیێنرێتە شوێنی مەبەست.

 

ئەوەی پێویستە بیزانیت: ئەم پرۆژەیە کێشەی کەمئاوی بۆ ماوەی 30 ساڵی دیکە لە هەولێر چارەسەر دەکات و گەورەترین پرۆژەیە لەسەر ئاستی هەرێمی کوردستان، پرۆژەکە لە ناحیەی کەورگۆسک لەسەر زێی گەورەیە و بە گوژمەی 480 ملیۆن دۆلار جێبەجێ دەکرێت.

 

ئەمەش بزانە: پرۆژەکە له‌ ڕۆژێكدا 480 هه‌زار مه‌تر سێجا ئاو دەپاڵێوێت، بۆ هه‌ر كاتژمێرێک 20- 21 هه‌زار مه‌تر سێجا ئاوى خاوێن بۆ گه‌ڕه‌كه‌كانى شارى هه‌ولێر دەنێرێت.