پرۆژەیاسا گرنگەکە بۆ کورد ئەمڕۆش لە پەرلەمانی عێراق پەسەند نەکرا

ئاڤا نیوز

 

ئێوارەی ئەمڕۆ ئەنجوومەنی نوێنەرانی عێراق، پرۆسەی دەنگدانی لەسەر ڕەشنووسی یاسای گەڕانەوەی خانووبەرە و زەوی و زار بۆ خاوەنەكانیان دەستپێكرد و دەنگدان لەسەر چەند بڕگەیەکی پرۆژە یاساکە تەواو بوو، بەڵام بەهۆی نەگەیشتنە ڕێککەوتن، دەنگدان لەسەر کۆی پرۆژە یاساکە بۆ سبەی سێشەممە هەڵگیرا.

 

وێنە گەورەكە: لە سەردەمی ڕژێمی ڕووخاوی بەعس ژمارەیەك بڕیار بۆ داگیركردنی زەویوزار و خانووی هاووڵاتیان لە ناوچە كوردستانییەكانی دەرەوەی ئیدارەی هەرێمی کوردستان دراوە، سەرەڕای ئەوەی حكومەتی فیدراڵی بە فەرمی بڕیاری ڕاگرتنی جێبەجێكردنی سەرجەم ئەو بڕیارانەی دابوو كە لە سەردەمی ڕژێمی بەعس دەرکراون، بەڵام پاڵپشت بەو بڕیارانە پێشێلكارییە ئیدارییەكان بەرامبەر هاووڵاتیان و جووتیارانی کورد و تورکمان هەر بەردەوام بوو و تاوەکو ئێستا 300 هەزار پارچە زەوی لەدەست عەرەبی هاوردەن.

 

زانیاریی بەدەستهاتوو: بەگوێرەی ئەو زانیارییانەی دەست ئاڤا میدیا كەوتووە، ئێوارەی ئەمڕۆ ئەنجوومەنی نوێنەرانی عێراق، دەستیكرد بە دەنگدان لەسەر ڕەشنووسی یاسای گەڕانەوەی خانووبەرە بۆ خاوەنەکانیان، دەنگدان لەسەر چەند بڕگەیەکی پرۆژە یاساکە تەواو بوو، بەڵام بەهۆی ناکۆکی چەند ئەندام پەرلەمانێک پرۆسەی دەنگدان تەواو نەکرا و بە هەڵپەسێردراوی بۆ سبەی سێشەممە هێڵدرایەوە.

زانیاریی زیاتر: بەگوێرەی ڕەشنووسی یاساكە سەرجەم ئەو بڕیارانەی لە سەردەمی ڕژێمی بەعسی ڕووخاو درابوون، هەڵدەوەشێتەوە.