ڕووسیا دەیان کورسی خوێندن بۆ هاووڵاتییانی هەرێمی کوردستان دابین دەکات

ئاڤا نیوز

 

ڕووسیا دەیان کورسی خوێندنی بەکالۆریۆس و ماستەر و دکتۆرا بۆ هاووڵاتیانی هەرێمی کوردستان دابین دەکات، سەرجەم تێچووی خوێندن و بژێوی مانەوەش لە ئەستۆی حکومەتی ئەو وڵاتە دەبێت.
 
وێنە گەورەكە: لە چوارچێوەی پڕۆگرامی ساڵانەی هەماهەنگیی نێوان هەردوو حكومەتی هەرێمی كوردستان و ڕووسیا، ئەو وڵاتە 70 کورسی خوێندنی بەکالۆریۆس و ماستەر و دکتۆرا لە بوارە جیاجیاکاندا بۆ ساڵی نوێی خوێندنی 2025 - 2026 بۆ خوازیارانی هەرێمی کوردستان دابین دەکات کە دەتوانن لەڕێگەی وێب سایتی فەرمی حکومەتی ڕووسیاوە داواکارییەکانیان پێشکەش بکەن.
 
ڕاگەیێنراوی فەرمی: بەگوێرەی نووسراوێکی وەزارەتی پلاندانانی حکومەتی هەرێمی کوردستان، بەڕێوەبەرایەتیی تواناسازی فەرمانبەرانی هەرێمی کوردستان، کە وێنەیەکی دەست ئاڤا میدیا کەوتووە، تێیدا گشتاندن بۆ هەر سێ سەرۆکایەتییەکەی هەرێمی کوردستان و سەرجەم وەزارەت و دامودەزگا نەبەستراوەکان بە وەزارەتەکان کراوە، بە ئاگادارکردنەوەی ئەو فەرمانبەرانەی کە خواستی پێشکەشکردنیان هەیە بۆ سوودمەندبوون لەم دەرفەتە.

چی پێویستە بکرێت: خوازیاران لەڕێگەی لینکێکەوە کە هاوپێچ کراوە دەتوانن داواکارییەکانیان پێشکەش بکەن و سەرجەم بەڵگەنامە داواکراوەکان هاوپێچ بکەن، دواتر ناوی کاندیدە وەرگیراوەکان بە لیستێک بۆ فەرمانگەی پەیوەندییەکانی دەرەوەی حکومەتی هەرێمی کوردستان ڕەوانە بکرێتەوە.