پێشمەرگە بەهۆی شەڕی سووریا دەخرێتە ئامادەباشی و سەنگەرەکانی پتەوتر دەکات

ئاڤا نیوز

دوای فراوانبوونی شەڕی حەلەب و دروستبوونی مەترسی لەسەر ڕۆژئاوای کوردستان و عێراق، کە لە چەند ناوچەیەک وەک حەلەب و تەل ڕەفعەت و شەهبا شەڕ لەگەڵ هێزە کوردییەکان (هەسەدە و یەپەگە) ڕووی داوە، لە دیوی هەرێمی کوردستان لە پێشخابوور و سێمێلکا تا زوومار هێزەکانی پێشمەرگە خراونەتە ئامادەباشییەوە. 

وێنە گەورەکە: ئاشكرایە سووریا دراوسێی عێراقە و سنوورێكی دوورودرێژیان پێكەوە هەیە، لە هەندێك شوێن سنوورەكە لە سنووری هەرێمی كوردستانیش نزیك دەبێتەوە، بۆ ئەوەی سیناریۆی هاتنی داعش لە ساڵی 2014 دووبارە نەبێتەوە، عێراق هەزاران سەربازی سوپا و هێزە ئەمنییەكانی  بردووەتە سەر سنوور و هەموو ئامادەكارییەكیان بۆ بەرپەرچدانەوەی هەر مەترسی و هێرشێك كردووە، پێشمەرگەش سەنگەرەکانی قامیتر کردوون.

ئەوەی پێویستە بیزانیت: لە هەر بارودۆخێکدا ئەگەر ئەو هێزە چەكدارییانەی سووریا بپەڕنەوە بۆ عێراق و شەڕ ڕووبدات، تا ڕادەیەك مەترسیی لەسەر ناوچە سنووریەكانی نێوان هەرێمی كوردستان و عێراقیش دروست دەبێت، كورد لە کۆنەوە دەڵێ پێش تا بەڕە بە خۆت دادە،  هێزی پێشمەرگەی كوردستانیش ڕێك ئەم پەندە كوردییە بەنرخەیان جێبەجێ كردووە.

زانیاریی زیاتر: بەدرێژایی سنووری هەرێمی كوردستان هێزی پێشمەرگە سەنگەریان هەیە و هەزاران پێشمەرگە لەو سەنگەرانەن و چاویان كراوەوەیە و شەو و ڕۆژیان لەسەر یەك داناوە بۆ ئەوەی خەڵكی كوردستان بە ئارامی بژین، ئینجا بۆ ئەوەی بەهیچ شێوەیەك مەترسیی نەپەڕێتەوە هەرێمی كوردستان و ئەو ئارامییەی كە ئێستا هەیە تێكنەچێت، ئاڤا زانیویەتی ئێستا هەموو ئامادەكارییەكیان كردووە و سەنگەرەكانیان پتەوتر كردووە.

باکگراوند: شەڕی قورسی گرووپە چەکدارەکانی ئۆپۆزسیۆنی سووریا بەسەرۆکایەتیی دەستەی تەحریر شام و حکومەتی بەشار ئەسەد کە لە حەلەبەوە دەستی پێکرد، پێی ناوەتە ڕۆژی شەشەم و تاوەکو ئێستا 446 کەس كوژراون كە زۆربەیان چەكدارانی گرووپە ئۆپۆزیسیۆنەكانن، نزیکەی 200 هەزار کوردیش لە تەل ڕەفعەت و شەها ئاوارە بوون، نزیکەی 300 هەزار کوردی دیکەش لە حەلەب ڕەوشیان خراپە و چارەنووسیان نادیارە.