هۆشداری لە بەکارهێنانی مۆبایل لەکاتی نانخواردن دەدرێت

ئاڤا نیوز

شارەزایانی تەندروستی هۆشداری بەو کەسانە دەدەن کە  لەکاتی نانخواردن مۆبایل بەکاردەهێنن و دەڵێن کاریگەری نەرێنی لەسەر تەندروستی مرۆڤ بەجێدەهێڵێت.

لێدوانی فەرمی: دکتۆر گاریس نی، مامۆستای باڵای فیزیۆلۆژی لە زانکۆی چیستەر لە بەریتانیا ڕایگەیاند: ''مۆبایلی زیرەک چەندین میکرۆبی زیانبەخش هەڵدەگرێت و دەگوازرێتەوە بۆ سەر مێزی نانخواردن و کێشەی تەندروستی دروست دەکات''.

بە وتەی دکتۆر نی، مۆبایلە زیرەکەکان ژینگەیەکی باشن بۆ گەشەکردنی میکرۆب و بەکتریا زیانبەخشەکان وەکو  E.coli  سۆدۆمۆناس، کە دەبنە هۆی ژەهراویبوونی خۆراک و هەوکردنی پێست و کاریگەری نەرێنی لەسەر هەناسەدان دروست دەکەن.

هۆکارە زانراوەکان: ئەو پزیشکە هۆکاری بوونی ئەم بەکتریایانەی لەسەر مۆبایل دەگەڕێننەوە بۆ ئەوەی کە ڕۆژانە مرۆڤ دەست لە چەندین ڕووکاری جیاواز دەدات و بەکتریای جیاواز هەڵدەگرن.

مەترسییەکان: ئەم بەکتریایانە لەوانەیە ببنە هۆی حاڵەتی تەندروستی مەترسیدار، وەک هەوکردنی سییەکان لەو کەسانەی سیستمی بەرگری لەشیان لاوازە.