ئەڵمانیا تۆڕێکی قاچاخچی کورد دەستگیردەکەن

ئاڤا نیوز

 

هێزەکانی پۆلیسی ئەڵمانیا هەڵمەتێکیان ئەنجامدا بۆ گەڕان بە دوای تۆڕێکی قاچاخچی کە خەڵکی هەرێمی کوردستانن و تۆمەتبارن بە قاچاخبردنی کۆچبەران لە ڕێگەی بەلەمەوە لە فەرەنساوە بۆ بەریتانیا.

 

وێنە گەورەکە: بەپێی زانیارییەکانی یۆرۆپۆل، تۆمەتباران کە سەرجەمیان لە ئەڵمانیا نیشتەجێن، کاری کڕین، هەڵگرتن و گواستنەوەی بەلەمی لاستیکیان ڕێکخستووە بۆ گواستنەوەی کۆچبەران لە کەناراوەکانی نزیک شاری کالێی فەرەنساوە بۆ بەریتانیا.

 

زانیاریی بەدەستهاتوو: بەپێی زانیارییەکانی پۆلیسی ئەڵمانیا، زیاتر لە 500 ئەفسەری پۆلیس لە چەند شارێکی ڕۆژئاوای ئەڵمانیا شوێنەکانیان پشکنیووە، ئۆپەراسیۆنییەکە بە هەماهەنگی لەگەڵ یۆرۆپۆل و دەزگا ئەمنییەکانی فەرەنسا ئەنجامدراوە.

 

هۆکارە زانراوەکان: تۆڕەکە تۆمەتبارن بە "بە قاچاخبردنی کۆچبەرانی نایاسایی لە ڕۆژهەڵاتی ناوەڕاست و ڕۆژهەڵاتی ئەفریقا بۆ فەرەنسا و بەریتانیا بە بەکارهێنانی جۆرە بەلەمێک کە کوالیتی خراپیان هەیە".

 

زانیاریی زیاتر: پۆلیس پشتڕاستی کردەوە کە زیاتر لە 20 لێکۆڵەری فەرەنسی و سێ بەرپرسی یۆرۆپۆل هاوکاری ئۆپەراسیۆنەکە دەکەن.

 

ئەوەی پێویستە بیزانیت: ئەو هەڵمەتانە دوای لێکۆڵینەوەی دەسەڵاتدارانی بەلجیکا، فەرەنسا و ئەڵمانیا دێت،  کە بە دوای تۆڕێکی دیکەی قاچاخچی بە ڕەچەڵەک کوردی ڕۆژهەڵاتی کوردستان دەگەڕان لە سەرەتای ئەمساڵدا  و 19 کەسیان لێ دەستگیرکردن.