سەرۆكی هەرێمی كوردستان هاوشانی سەرۆکی وڵاتان میوانی سەرۆكی فەرەنسا دەبێت

ئاڤا نیوز

سەرۆكی هەرێمی كوردستان هاوشانی سەرۆک و سەركردەكانی جیهان لە مەراسیمی دووبارە كردنەوەی دەرگای كاتێدرالی نۆتردام لە شاری پاریس میوانی سەرۆكی فەرەنسا دەبێت.

 

وێنە گەورەكە: ڕۆژی شەممە 07-12-2024، كاتێدرالی نۆتردام لە شاری پاریس دەكرێتەوە، بە مەبەستی بەشداریكردن لە مەراسیمی كردنەوەی دەرگای تەلارە دێرینەكە، نێچیرڤان بارزانی، سەرۆكی هەرێمی كوردستان، هاوشانی سەركردەكانی جیهان بانگهێشتانەی فەرمی ئیمانوێڵ ماكرۆن، سەرۆكی فەرەنسای پێگەیشتووە.

 

بۆچی گرنگە: بەشداریكردنی هەرێمی كوردستان لەپاڵ وڵاتانی جیهان، ڕەهەندی مێژوویی و سیاسی و كولتووری گەورەی هەیە، بانگهێشتی سەركردە جیهانییەكان بۆ ئەو بۆنەیە پەیامێكی گشتگیری تێدایە بە ئاراستەی داڕشتنەوەی پەیوەندییەكانی فەرەنسا لەگەڵ دۆستەكانیدا.

 

باكگراوند: پەیوەندییەكی دۆستانەی مێژوویی لەنێوان هەرێمی كوردستان و فەرەنسا هەیە، لە چەندین وێستگەی گرنگدا، فەرەنسا پاڵپشتی و پشتیوانی خۆی بۆ خەڵكی كوردستان و قەوارە دەستووریی و سیاسییەكەی دووپاتكردووەتەوە، میوانداریكردنی سەرۆكایەتی هەرێمی كوردستان بۆ ئەم بۆنە گرنگە، هێمایە بۆ پتەویی پەیوەندیە دووقۆڵییەكانی نێوان فەرەنسا و هەرێمی كوردستان لەهەموو ڕووێكەوە.