پێكهاتەكان داوای بەشداری لە حكومەت و زیادكردنی كورسییەكانیان لە پەرلەمان دەكەن

ئاڤا نیوز 

 

نوێنەری پێكهاتەكانی هەرێمی كوردستان، لە شاری هەولێر كۆبوونەوە و بە تێكڕا داوا دەكەن لە كابینەی نوێی حكومەت بەشدارێكی كارا بن و دەشیانەوێ كورسییەكانیان لە پەرلەمانی كوردستان بكرێتە 15 كورسی. 

 

 

لێدوانی فەرمی: ئایدن مەعرووف، وەزیری هەرێم بۆ كاروباری پێكهاتەكان و ئەندامی مەكتەبی سیاسیی بەرەی توركمانی بە ئاڤای ڕاگەیاند: ئەمڕۆ كۆبوونەوەیەكی ڕاوێژكاریمان لەگەڵ پێكهاتە نەتەوەیی و ئاینییەكان کرد، ئێستا كە لەسەروبەندی پێكهێنانی كابینەی نوێی حكومەتین، ئێمە وەک پێكهاتەكان پێشووتریش ڕامانگەیاندووە و ئەمڕۆش جەختمان كردەوە كە پێویستە خێرا بكرێت لە پێكهێنانی حكومەت، گرنگە سەرجەم لایەنەكان بەشداربن، بەتایبەتی پێكهاتەكان.

 

 

لەلایەكی دیكەوە: سەبارەت بە ئەو پۆستانەی كە پێكهاتەكان داوای دەكەن ئایدن مەعرووف ڕایگەیاند: لە هەموو شتێک گرنگتر سەقامگیریی سیاسییە لە هەرێمی كوردستان، هاوكات ئەوەی بۆ ئێمە گرنگە ئەوەیە هەروەک چۆن لە ڕابردوودا پێكهاتەكان بەشداریی كارا و گرنگیان هەبووە، لە كابینەی نوێش بەهەمانشێوە بەشداربوویەكی گرنگ بن.

 

 

گۆشەیەكی دیكە: ئایدن مەعرووف ئاماژەی بەوەش دا كە پێكهاتەكان داوا دەكەن، لە پێكهێنانی حكومەت، كورسیی كۆتا نەكرێتە بنەما بۆ پێدانی پۆست بە پێكهاتەكان "چونكە نادادپەروەری بەرامبەر بە كۆتا كراوە لە كەمكردنەوەی كورسییەكانی پەرلەمان" بەڵكوو وەک نەتەوە مامەڵە بكرێت و هەموو پێكهاتەكانی لەسەر ئەو بابەتە كۆكن، گوتیشی: داواكاریی ئێمە ئەوەیە یاسای هەڵبژاردن گۆڕانكاریی تێدا بكرێت و كورسیی پێكهاتەكان لە پەرلەمانی كوردستان بكرێنە 15.