چاککردنەوەی بۆری ئاوی ئیفراز یەک کۆتایی هات

ئاڤا نیوز

لەماوەی دوو ڕۆژی کارکردن لە بەشێکی بۆری ئاوی ئیفراز یەک، توانرا کارەکانی تەواو بکرێت و ئەو گەڕەکانەی بەهۆی چاکسازی لە بۆرییەکە بێ ئاو ببوون، درەنگانی ئەمشەو ئاو دەگاتەوە ماڵەکانیان.

وێنە گەورەکە: پڕۆژەی ئاوی ئیفراز یەک لە ساڵی 1968 دروستکراوەو بەشێکی گەڕەکەکانی ڕۆژئاوای شاری هەولێر بۆ دابینکردنی ئاو سوود لەو پڕۆژەیە وەردەگرن.

 

لێدوانی فەرمی: ڕابەر حسێن، بەڕێوەبەری ئاوی هەولێر بە ئاڤا نیوزی ڕاگەیاند، دوای دوو ڕۆژ کارکردن لە گۆڕینی 300 مەتر بۆڕی ئاوی ئیفراز یەک، ئەمڕۆ هەینی کارەکانی بە کۆتا هات، ئەمشەو کاتژمێر 12ـی شەو، ئاوی هەریەکە لە گەڕەکەکانی (بەختیاری، وەزیران، نەورۆز، شەقامی ئەلبان، نێرگز و کوردستان) دێتەوە و گرفتیان نامێنێت.

 

بۆچی گرنگە: ڕابەر حسێن، ئەوەش دەڵێت: لە ساڵی 1968ـەوە ئەو بۆریە دانرابوو، لە زۆر شوێن لیکی دەکرد، جگە لەوە خۆڵی دەووروبەری بۆریەکە ببوو بە هۆکارێک بۆ داخورانی بۆڕییەکە، بۆیە لەگەڵ گۆڕینی، خۆڵی چواردەوروبەری بۆرییەکەش گۆڕدرا، بەمەش تا ماوەیەکی زۆر گرفتی شکانی بۆریەکە دوورخرایەوە و ئاو بەشێوەیەکی باشتر و تەندروستر دەگاتە ئەو گەڕەکانەی لەسەر هێڵی ئاوی ئیفراز یەکن.