سەرۆك بارزانی پەیامێك سەبارەت بە دۆخی ئێستای سووریا بڵاودەکاتەوە

ئاڤا نیوز

 

هێزەکانی ئۆپۆزیسیۆنی سووریا هەر کاتژمێرێک و ناوچەیەکی تازە لە سووریا کۆنترۆڵ دەکەن. سوپای سووریا لە هەندێک شوێن بەتەواوی ورەی لەدەست داوە و بەبێ شەڕ ناوچەکان ڕادەست دەکەن، لە هەندێک شوێنیش ڕووبەڕووبوونەوە هەیە. پەرەسەندنەکان لە سووریا کاریگەریی لەسەر ناوچەکە دەبێت و لەوبارەیەوە سەرۆک بارزانی دەڵێت " بە بایەخێکی زۆرەوە بەدواداچوون بۆ ڕووداو و گۆڕانکارییەکانی ئەم دواییە دەکەین".

 

وێنە گەورەکە: لە 27ی مانگی 11 هێزەکانی ئۆپۆزیسۆنی سووریا لە ئیدلبەوە دەستیان بە هێرشێکی فراوان کرد، کە وەک خۆیان دەڵێن ئەمجارە ئامانجیان گۆڕینی حوکمە لە سووریا. لەو کاتەوە تاوەکو ئێستا گەورە شارەکانی حەلەب و حەمایان کۆنترۆڵکردووە. ئێستا نزیکن لە کۆنترۆڵکردنی حومس، دوای ئەوەش تەنیا 20 کیلۆمەتریان دەمێنێت بگەنە دیمەشقی پایتەخت.

 

پەیامەکەی سەرۆک بارزانی: سەبارەت بە دۆخی ئێستای سووریا، سەرۆك بارزانی لە پەیامێكدا دەڵێت:

•     ئومێدی ئەوە دەخوازین لایەنەکان بە شێوەیەکی ئاشتییانە بگەنە ڕێککەوتنێک کە لە بەرژەوەندیی سەرجەم پێکهاتەکانی سووریا.
 
•    بایەخێکی زۆرەوە بەدواداچوون بۆ ڕووداو و گۆڕانکارییەکانی ئەم دواییە دەکەین کە لە سووریا ڕوو دەدەن، چونکە ئەو پێشهات و ڕووداوانە کاریگەریی ڕاستەوخۆی لەسەر چارەنووسی سیاسی و ئاسایش و سەقامگیریی سووریا و تێکڕای ناوچەکەمان هەیە.
 
•     پێشهات و گۆڕانکارییەکانی سووریا لە ئەنجامدا ببنە هۆی ئەوەی گفتوگۆ و لێکتێگەیشتن ببێتە بنەمای چارەسەرکردنی کێشەکان.

 

بۆچی گرنگە: لە 13 ساڵی ڕابردوودا کە شەڕ لە سووریا بەردەوامە بەشار ئەسەد بە پشتیوانیی ڕاستەوخۆی ئێران و ڕووسیا توانی لە دەسەڵات بمێنێتەوە، بەڵام ئەمجارە گۆڕانکارییەکان خێران و هەموو ئاماژەکان بۆ ئەوەن کە حوکمی ئەسەد لە سووریا کۆتایی دێت.

 

ئەمەش بزانە: سێرگی لاڤرۆڤ، وەزیری دەرەوەی ڕووسیا لە دۆحەوە ڕایگەیاند: 'ڕێگە نادەین تیرۆرستەکان سەرکەوتن بەدەستبهێنن". باسی لە هەوڵی سێقۆڵیی ئێران، تورکیا و ڕووسیاش کرد بۆ دۆزینەوەی چارەسەری سیاسی.

 

ئەوەی ئێستا ڕوودەدات: هێزێکی زۆری سەربازیی سوپای سووریا بە هەموو پێکهاتە و چەکە جۆراوجۆرەکانییەوە لە حومس کۆبوونەتەوە، بەپێی ئەو هەواڵانەی هەن، باس لە هەبوونی بۆردوومانی سەخت و زۆر تووندی هێزەکانی سووریا بۆ سەر هێزەکانی دەستەی تەحریرولشام و گرووپە هاوپەیمانەکانی دەکرێت کە گەیشتوونەتە دەوروبەری باکووری حمس.