وەزیری دەرەوەی عێراق: ترسی سەرەکی ئێمە لە سووریا گەڕانەوەی داعشە

ئاڤا نیوز 

 

وەزیری دەرەوەی عێراق ڕایدەگەیێنێت، ترسیان لەوە هەیە لە ئەنجامی ئەو پەرەسەندنەی لە سووریا هەیە، داعش جارێکی دیکە سەر هەڵبداتەوە و مەترسیی لەسەر ئاسایشی نیشتمانی عێراق دروست بکات.

 

وێنە گەورەکە: ئەگەرچی دەزگا ئەمنییەکانی عێراق ڕێوشوێن و ڕێکاری پێویستیان گرتووەتەبەر و بەدرێژایی سنووری سووریا هێزیان بڵاوە پێکردووە و حکومەتیش سنوورەکانی بە تەواوەتی لەگەڵ ئەو وڵاتە داخستووە، بەڵام ترس لە ئازادکردنی ئەو چەکدارە عێراقیانە هەیە کە ئەندامی داعشن و لە زیندانەکانی سووریان.

 

لێدوانی ڕۆژنامەوانی: فوئاد حوسێن، وەزیری دەرەوەی عێراق ڕایگەیاند: بەغدا لە ڕووی سەربازییەوە دەستوەردان لە سووریا ناکات و خوازیاری ئاساییکردنەوەی بارودۆخەکە و یارمەتیدانی ئاوارەکانە. ئاماژە بۆ ئەوەش دەکات، ئەگەر شەڕ لە سووریا بەردەوام بێت، کارەساتی مرۆیی ڕوودەدات.

 

مەترسییە پێشبینیکراوەکان: بە گوتەی فوئاد حوسێن سەرنجی ئێستای ئەوان لەسەر دۆخی سووریایە و دەڵێت: ئێستا چەندین گرووپی چەکداری جیاواز لە سووریا هەن، لەلایەکی دیکە داعش لەسەر سنوورەکانی عێراق و سووریا هەن، هاوکات ترسی ئەوەمان هەیە لایەنێک لەو لایەنانە کۆنترۆڵی ئەو بەندیخانانەی سووریا بکات کە بە سەدان و هەزاران ئەندام و سەرکردەکانی ڕێکخراوی داعش هەن، ترسی ئێمە لەو ڕووەوەیە.

 

ئەوەی لەبارەیەوە دەگوترێت: وەزیری دەرەوەی عێراق،"ترسی ئێمە لەوەیە سووریا بە هێزی چەک پارچە پارچە ببێت، گرووپی جیاواز جیاواز لە شوێنی دیاریکراو کۆنترۆڵی ناوچەکە بکات".