سوودانی: بەبۆنەی ڕۆژی سەرکەوتن بەسەر داعش ئاهەنگ ساز بکەن

ئاڤا نیوز

 

حەوت ساڵ بەسەر رزگارکردنی تەواوی عێراق لەدەست چەکدارانی داعش تێپەڕ دەبێت، کە زیاتر لە سێ ساڵ بەشێک لە ناوچەکانی عێراق لە ژێرکۆنترۆلی چەکدارانی داعش دابوون، دواتر هێزەکانی عێراق بە هاوکاری هاوپەیمانان توانییان تەواوی عێراق بگەڕێننەوە ژێر کۆنترۆڵی حکومەتی عێراق.

 

چیرۆکی سەرەکی: لە ساڵیادی ڕۆژی سەرکەوتن بەسەر داعش، ساڵانە حکومەتی عێراق لەسەرجەم دامودەزگاکان پشوو ڕادەگەیێنت و ئاهەنگ و چالاکی جۆراوجۆر ئەنجامدەدات، بۆ ئەمساڵیش لەسەر ڕاسپاردەی سەرۆکوەزیرانی عێراق ئاهەنگ و چالاکی بەڕێوەدەچێت. 

 

ڕاگەیێراوی فەرمی: محەممەد شیاع سوودانی، سەرۆکوەزیرانی عێراق چەند ڕێنماییەکی ئاراستەی دامودەزگاکانی حکومەت کردووە، وەزارەتەکانی پەروەردە لە بەغدا و پارێزگاکان و هەرێمی کوردستان بەتایبەتی لە ناوچە ئازادکراوەکان ئاگادار کردۆتەوە بۆ ئەوەی ڕۆژی پێنجشەممە 12-12- 2024 بکەنە ڕۆژی ئاهەنگی ناوەندی بۆ قوتابییان لە قوتابخانە و زانکۆ و پەیمانگەکان.

 

 هاوکات، سەرۆکوەزیرانی عێراق ڕێنماییەکانی ئاراستەی هێزە ئەمنییەکانیش لەسەرجەم قایمەقامییەتەکان کردووە، بۆئەوەی کار لەسەر ئەنجامدانی چالاکییە جەماوەرییەکان بکەن بۆ ئاهەنگگێڕان بەبۆنەی حەوتەمین ساڵیادی ڕۆژی سەرکەوتنی گەورە لەسەرجەم قەزا و ناحیەکان لە ماوەی 8- 12- 2024  تا 12-12- 2024.

 

هەر لە ڕاگەیێنراوەکەدا هاتووە، سەرۆکوەزیران ڕێنماییەکانی ئاراستەی سەندیکا و کۆمەڵە و ڕێکخراوەکانی کۆمەڵی مەدەنی بۆ یادکردنەوەی ئەو سەرکەوتنە گەورەیە بۆ ماوەی چوار ڕۆژ، هەروەها ڕاسپاردنی شارەوانی بەغدا و بەڕێوەبەرایەتیی شارەوانییەکان بۆ کردنەوەی پارکەکان بۆ یادکردنەوەی ئەو ڕۆژە.

 

ئەوەی پێویستە بیزانیت: بەبۆنەی سەرکەتنی عێراق بەسەر داعش ڕۆژی 10- 12- 2024 لەسەرجەم دامودەزگاکانی عێراق پشووی فەرمییە.