خەمیس خەنجەر بەبۆنەی ڕووخانی ئەسەد پیرۆزبایی لە گەلی سووریا دەکات

ئاڤا نیوز

 

سەرۆکی هاوپەیمانیی سیادە لە پەرلەمانی عێراق لە پەیامێکدا بە بۆنەی ڕووخانی دەسەڵاتی بەشار ئەسەد پیرۆزبایی لە گەلی سووریا کرد و هیوای خواست وڵاتێکی نوێ لەسەر بنەمای "هاووڵاتیبوون و ئازادی" بونیاد بنرێت و بەهاکانی دادپەروەری و مافەکانی مرۆڤ بێ جیاوازی فەراهەم بکرێن.

 

وێنە گەورەکە: بەرەبەیانی 8-12-2024 گرووپە چەکدارەکانی سووریا گەیشتنە ناوەندی شاری دیمەشقی پایتەخت و کۆنتڕۆڵیان کرد، هاوکات بەشار ئەسەد، سەرۆکی وڵات بۆ شوێنێکی نادیار هەڵهات، ئەم پێشهاتە کاردانەوەی دەرەکیی بەدوای خۆیدا هێنا.

 

ڕاگەیێنراوی فەرمی: خەمیس خەنجەر، سەرۆکی هاوپەیمانیی سیادە لە پەرلەمانی عێراق لە بەیاننامەیەکدا ڕایگەیاند: سەردەمی حوکمڕانی دیکتاتۆریی خوێنڕێژ لە سووریا کۆتایی هات و سەردەمێکی نوێ دەستیپێکرد کە هیواخوازین ببێتە مایەی خێر و پێشکەوتن بۆ گەلی سووریا.

 

خەنجەر داوای لە تەواوی وڵاتان کرد ڕێز لە هەڵبژاردەی گەلی سووریا لە دیاریکردنی مافی چارەنووس و نەخشاندنی داهاتوویان بگرن و دەستێوەردان لە کاروباریان نەکەن.

 

لەلایەکی دیکەوە: بەگوێرەی گوتەکانی ڕامی عەبدولڕەحمان، سەرۆکی ڕوانگەی سووری بۆ مافەکانی مرۆڤ، چارەنووسی بەشار ئەسەد نادیارە و نازانرێت بۆ چ شوێنێک هەڵهاتووە.