یەکەم هەڵوێستی حکومەتی عێراق لەبارەی ڕووخانی دەسەڵاتەکەی ئەسەد

ئاڤا نیوز

 

حکومەتی عێراق لە یەکەم کاردانەوەیدا پەیوەست بە گۆڕانی دەسەڵات لە سووریا و ڕووخانی دەسەڵاتەکەی بەشار ئەسەد ڕایگەیاند، ڕێز لە خواستی ئازادانەی سوورییەکان دەگرێت و داواش لە لەلایەنەکانی سووریا دەکات گفتوگۆییەکی گشتگیریی ناوخۆیی بۆ چۆنیەتی بەڕێوەبردنی دەسەڵات لە داهاتوودا دەستپێبکەن.

 

وێنە گەورەکە: دوای تێپەڕبوونی نیو سەدە لە حکومڕانی بنەماڵەی ئەسەد و 13 ساڵ بەسەر خۆپیشاندانەکانی سووریادا، بەرەبەیانی ڕۆژی یەکشەممە 8-12-2024، چەکدارانی ئۆپۆزیسیۆنی ئەو وڵاتە، دیمەشقی پایتەختیان کۆنترۆڵکرد و بەشار ئەسەدی سەرۆکی هەڵاتووی سووریاش بەرەو جێگەیەکی نادیار ڕۆشتووە.

 

ڕاگەیێنراوی فەرمی: باسم عەوادی، وتەبێژی حکومەتی عێراق لە ڕاگەیێنراوێکدا دەڵێت، پشتیوانی هەوڵە نێودەوڵەتیی و هەرێمییەکان دەکەین بۆ دەستپێکردنی گفتوگۆیەکی گشتگیر لە نێوان لایەنەکانی سووریا بەو جۆرەی بەرژەوەندی گەلی سووریا دەیخوازێت، هەتا دەگاتە قۆناغی پەسەندکردنی دەستوورێک کە مافەکانی مرۆڤ بپارێزێت و ڕێزیش لە فرە ڕەنگی پێکهاتە نەتەوەیی، دینی و مەزهەبییەکانی سووریا بگرێت.

 

ئەوەشی خستوەتەڕوو، گرنگە بۆ بەرژەوەندی هیچ لایەنێک دەستوەردان لە دۆخی سووریادا نەکرێت چونکە دەستوەردانەکان تەنیا سوورییەکان زیاتر پەرتەوازە دەکات و زیان بە گەلەکەی دەگەیێنێت، جەختیش لەسەر ڕێزگرتن لە خواستی ئازادانەی سوورییەکان دەکەنەوە و زۆر بە گرنگی دەزانن لە هەموو دۆخێکدا ئاسایش و یەکێتی و سەربەخۆیی سووریا پارێزراوبێت.