مەزڵوم عەبدی: لەبارەی منبج بە نێوەندگیری ئەمریکا ڕێککەوتین

ئاڤا نیوز

 

فەرماندەی گشتیی هەسەدە ڕایگەیاند، لەبارەی شارۆچکەی منبجی ڕۆژئاوای ڕووباری فوڕات، بە نێوەندگیری ئەمریکا لەگەڵ گرووپە چەکدارەکان ڕێککەوتوون و بۆ پاراستنی گیانی هاووڵاتیان، لە زووترین کاتدا لە شارۆچکەکە دەکشێننەوە.

 

ئەوەی پێویستە بیزانیت: زیاتر لە دوو هەفتەیە گرووپە چەکدارەکانی ئۆپۆزیسیۆنی سووریا کە تورکیا پشتیوانیان دەکات، هێرشەکانیان بۆ کۆنتڕۆڵکردنی شارۆچکەی منبج چڕکردووەتەوە و دەیانویست شارۆچکەکە لە بن دەستی هەسەدە دەربهێنن.

 

ڕاگەیێنراوی فەرمی: مەزڵوم عەبدی، فەرماندەی گشتیی هێزەکانی سووریای دیموکرات (هەسەدە) لە هەژماری فەرمی خۆی لە تۆڕی ئێکس بڵاویکردەوە، لەکاتێکدا هێزەکانیان لە منبج بەردەوامن لە بەرگریگرتن بە ئامانجی ڕاگرتنی فراوانبوونی هێرشەکان لە ڕۆژئاوای فورات، بە نێوەندگیریی ئەمریکییەکان بۆ ڕاگرتنی شەڕ لەو شارۆچکەیە گەیشتوونەتە ڕێککەوتن، ئەوەش بۆ پاراستنی ئاسایش و گیانی هاووڵاتیان.

 

بەگوێرەی ڕێککەوتنەکە ئەنجوومەنی سەربازی منبج کە سەر بە هەسەدەیە و لە 27ی مانگی ڕابردووەوە بەرپەرچی هێرشی گرووپە چەکدارەکانی نزیک لە تورکیا دەداتەوە، لە زووتریدا کاتدا لەو شارۆچکەیە دەکشێتەوە، لەم بارەیەوە فەرماندەی هەسەدە دەڵێت، ئامانجیان ڕاگرتنی شەڕە لە هەموو سووریا و چوونە ناو پرۆسەیەکی سیاسییە بۆ داهاتووی وڵاتەکە.

 

باکگراوند: ڕۆژی 8-12-2024، گرووپە چەکدارەکانی سووریا توانیان بچنە نێو دیمەشق و کۆتایی بە دەسەڵاتی 53 ساڵەی بنەماڵەی ئەسەد بهێنن.