ئەمریکا مەرجەکانی خۆی بۆ داننان بە حکومەتی نوێ لە سووریا ڕادەگەیێنێت

ئاڤا نیوز

 

وەزیری دەرەوەی ئەمریکا پشتگیری وڵاتەکەی بۆ سووریایەکی نوێ دووپاتکردەوە و چەند مەرجێکیشیان ڕاگەیاند بۆ داننان بە حکومەتی نوێ. 

 

وێنە گەورەکە: دوای کۆتاییهاتنی دەسەڵاتی بەشار ئەسەد لەلایەن چەکدارانی ئۆپۆزیسیۆن و دەستبەکاربوونی محەممەد بەشیر وەک سەرۆکوەزیرانی نوێی سووریا، ئەمریکا پشتگیری خۆی بۆ سووریای نوێ ڕاگەیاند.

 

لێدوانی فەرمی: ئه‌نتۆنی بلینكن، وه‌زیری ده‌ره‌وه‌ی ئه‌مه‌ریكا ڕایگەیاند. کۆشکی سپی چەند مەرجێکی داناوە بۆ داننان بە حکومەتی تازەی سووریا، ئەمانیش:-
 
یەکەم:  هەر حکومەتێک جێگەی بەشار ئەسەد بگرێتەوە، دەبێت ڕێز لە مافی کەمینەکان بگرێت.

دووەم:  پێویستە وڵاتانی دیکە خۆیان لە هەر دەستوەردانێک لە چارەنووسی سووریا بەدوور بگرن.

 

سێیەم: ئەمریکا پشتگیرییه‌كی ته‌واو له‌ حكومه‌تی داهاتووی سووریا ده‌كات و دانی پێدا ده‌نێت.

 

چوارەم:  پشتگیری لەو سەرکردە نوێیانەی سووریا دەکەین کە تیرۆر ڕەتدەکەنەوە. 

 

پێنجەم:  سووریای نوێ دەبێت ڕێگری بکات وڵاتەکەی ببێتە مۆڵگەی تیرۆر و هەموو جبەخانەی کیمیایی و چەکی بایۆلۆجی سوپای بەشار  ئەسەد دەبێت لەناو ببرێت.

 

شەشەم: کۆشکی سپی هەوڵدەدات سووریا لە خولگەی ئێران و ڕووسیا دەربهێنێت کە لایەنگرانی سەرەکی ڕژێمی بەشار ئەسەد بوون. 

 

ئەمەش بزانە: ئەمریکا و بەریتانیا دەیانەوێت دەستەی تەحریرولشام کە ئەبوو محەممەد جۆلانی سەرۆکایەتی دەکات و یەکێکە لە داواکراوانی لسیتی ڕەشی ئەمریکا، لە لیستی تیرۆر دەربهێنێت و پشتگیری بۆ سووریای نوێ دەربڕیوە.