وەزارەتی دەرەوەی ئەمریکا لەبارەی دەرهێنانی ئەبوو محەممەد جۆلانی لە لیستی تیرۆر بۆ ئاڤا قسە دەکات

ئاڤا نیوز 

 

وەزارەتی دەرەوەی ئەمریکا لەبارەی دەرهێنانی ناوی ئەبوو محەممەد جۆلانی، سەرۆکی دەستەی تەحریرولشام لە لیستی تیرۆر بە ئاڤا نیوزی گوت، ئێستا ئەوان قسە لەسەر ئەو بابەتە ناکەن. 

 

وێنە گەورەکە: دوای کۆنترۆڵکردنی دیمەشق و کۆتاییهێنان بە حوکمی 53 ساڵەی بنەماڵەی ئەسەد، ئێستا ئەبوو محەممەد جۆلانی کار دەکات بۆ پێکهێنانی حکومەتێک و دروستکردنی پەیوەندی دیپلۆماسیی لەگەڵ وڵاتانی جیهان لەنێویاندا ئەمریکا، بەڵام تاکە ڕێگر لەبەردەم ئەو پرۆسەیە ئەوەیە کە جۆلانی لەنێو لیستی تیرۆر و سزای ئەمریکادایە. 

 

لێدوانی فەرمی: ماتیۆ میلەر، گوتەبێژی وەزارەتی دەرەوەی ئەمریکا بە ئاڤا نیوزی ڕاگەیاند،  "ئێستا قسە لەسەر ئەو بابەتە ناکەین، نامانەوێت گفتوگۆی ئەگەری بکەین کە پەیوەندییان بە دەستنیشانکردنی تیرۆرستان هەیە  و دەستبەجێ بڕیار لەسەر ئەو سزایانە ڕابگەیەنین کە سەپاندوومانە، یان خستنە لیستی تیرۆری دەستەی تەحریرولشام یان سزاکانی دیکە لە ماوەی دەیەی ڕابردوو کە لە سووریا سەپاندوومانە".

 

میلەر دەڵێت ئەو سزایانەی سەپاندوویانە لە وەڵامی ئەو کارانەدا بووە کە ئەو گرووپانە ئەنجامیان داوە، سزاکان بەشێوەیەک داڕێژراون کە ببنە هاندەرێک بۆ ڕێبازە جیاوازەکانی کاری ئەو گرووپانە و تەنانەت وڵاتانیش، وەک ئەمریکا دەیانەوێت ئەو گرووپانەی سزادراون ڕێڕەوی کارەکانیان بگۆڕن.

 

گوتەبێژی وەزارەتی دەرەوەی ئەمریکا لێدوانێکی جۆ بایدن بە نموونە دەهێنێتەوە کە گوێیان لە هەندێک لێدوانی هیوابەخشی دەستەی تەحریرولشام بووە، قسەی دروستیان سەبارەت بە پرۆسەیەکی سیاسی کردووە هەنگاوی نوێ بنێت بەرەو پێشەوە. دەشڵێت: "بەڵام لە کۆتاییدا، ئێمە بە کارەکانیان حوکمیان لەسەر دەدەین. واتە وەڵامی ئێمە پەیوەستە بەو کارانەی دەیکەن".

 

لەلایەکی دیکەوە: دوای ڕووخانی دەسەڵاتی بەشار ئەسەد لە سووریا، هێزەکانی ئۆپۆزیسیۆن حکومەتێکی ڕاگوزەرییان بە سەرۆکایەتیی محەممەد بەشیر پێکهێناوە و لە دوێنێوە بەفەرمی دەستبەکار بووە.