ئیلهام شاهین: خوازيارم لەگەڵ سینەماكارانی كورد فیلمێكی هاوبەش بەرهەم بهێنین

ئاڤا نیوز

 

ئەكتەری ناوداری سینەمایی جیهان و وڵاتانی عەرەبی "ئیلهام شاهین" دەڵێت، ئاواتەخوازم لەگەڵ ئەكتەران و سینەماكارانی هەرێمی كوردستان، فیلمێكی سینەمایی یاخود درامایێكی هاوبەش بەرهەم بهێنم".

 

وێنە گەورەكە: سینەماكاری ناسراوی جیهان و وڵاتانی عەرەبی، ئیلهام شاهین بە مەبەستی بەشداریكردن لە (یازدەهەمین فیلمە فێستیڤاڵی دهۆكى نێودەوڵەتی) لە هەرێمی كوردستانە، كە ساڵانە بە بەشداری دەیان سینەماكار و دەرهێنەری جیهانی و ناوخۆیی و بەنمایشكردنی چەندین فیلم و كورتە فیلم، بەڕێوەدەچێت.

 

لێدوانی فەرمی: ئیلهام شاهین، بە دەزگاكانی ڕاگەیاندنی وت: "پێشنیازم كردووە كارێكی هاوبەشی سینەمایی یاخود درامای تەلەفزیۆنی لەگەڵ سینەماكارانی كورد بەرهەم بهێنین و ئاواتەخوازم ئەوە ڕووبدات".

هاوکات، ئەكتەری ناوداری میسری ستایشی ئەو پێشكەوتن و پەرەسەندنەی كرد كە لە بواری هونەری سینەمای هەرێمی كوردستان بەدی هاتووە، وەهای وەسفكرد كە ڕەنگدانەوەی ڕەسەنایەتی و مێژووی شارستانیی خەڵك و خاكی كوردستانە كە پێی ناسراون.

باکگراوند: ئیلهام شاهین ئەكتەری ناوداری میسڕ، ئێستا تەمەنی 64 ساڵە و زیاتر لە 43 ساڵە، سەرقاڵی كاری هونەرییە و لەو ماوەیەدا لە دەیان فیلمی سینەمایی و درامای تەلەفزیۆنی ڕۆڵی گێڕاوە.