سێ قوتابخانەی 12 پۆلی لە هەولێر دروست دەكرێن

ئاڤا نیوز

 

وەزیری پەروەردەی حكومەتی هەرێمی كوردستان بەردی بناغەی پڕۆژەی دروستكردنی سێ قوتابخانەی 12 پۆلی لە كەسنەزان، شاوێس و مامزاوای هەولێر دانا.

 

بۆچی گرنگە: لەم سێ قوتابخانەیە، قوتابیانی پەنابەر و خانەخوێ دەتوانن وانەی تێدا بخوێنن، تێچووی هەر سێ قوتابخانەكە، دوو ملیار و597 ملیۆن 527 هەزار دینارە.

 

لێدوانی فەرميی: ئالان حەمە سەعید، وەزیری پەروەردەی حكومەتی هەرێمی كوردستان ڕایگەیاند: حكومەتی هەرێمی كوردستان سەلماندویەتی كە خوێدن لە هەرێمی كوردستان بێ جیاوازی بۆ هەمووانە، سیاسەتی تێكەڵكردنی پەنابەران سیاسەتێكی سەركەوتووبووە، دانانی بەردی بناغەی ئەم سێ قوتابخانەیەش هەر لەو چوارچێوەیەدایە.

 

لەلایەكی دیكەوە: جان نیكۆلا بۆس، نوێنەری كۆمسیاری باڵای نەتەوەیەكگرتووەكان بۆ كاروباری پەنابەران بە ئاڤا نیوزی ڕاگەیاند: زۆر بەشانازییەوە باسی حكومەتی هەرێمی كوردستان دەكەین بۆ سەركەوتنی لە بواری گرنگیدان بە پەروەردە، پەنابەرانی كوردستان دەرفەتێكی گەورەیان بۆ ڕەخساوە بۆ درێژەدانیان بەخوێندن.