ئەندامێکی لیژنەی ئاسایش و بەرگریی پەرلەمان: ئاسایشی سنوور لەوپەڕی پارێزراوی دایە

ئاڤا نیوز

 

ئەندامێکی لیژنەی ئاسایش و بەرگریی لە پەرلەمانی عێراق دەڵێت، ئاسایشی سنووری وڵاتەکەی لەگەڵ سووریا لەوپەڕی پارێزراوی دایە و هەماهەنگیش لەگەڵ لایەنی سەربازیی ئەو وڵاتەدا هەیە.

 

ئەوەی پێویستە بیزانیت: لە چەند ڕۆژی ڕابردوودا و دوای ڕووداوەکانی سووریا، بزوتنەوەی نوجەبا کە گرووپێکی چەکداری عێراقییە، هۆشداریدا لەوەی بەسەرۆکایەتی بەریتانیا ژوورێک بۆ "تێکدانی عێراق" لە بەغدا دروستکراوە و داوای لە حکومەت کرد هاوشێوەی سنورەکان، ئاگای لە دۆخی ناوخۆش بێت.

 

لێدوانی فەرمی: عەلی ئەلساعید، ئەندامی لیژنەی ئاسایش و بەرگریی لە پەرلەمانی عێراق بە ئاڤا میدیای ڕاگەیاند، هەڵوێستی حکومەت لەئاستی پێویست دایە و نایەوێت لە کاروباری ناوخۆی وڵاتاندا دەستوەردان بکات، بەڵام بۆ پاراستنی سنوورەکانی هێزی زۆری بەدرێژایی 600 کیلۆمەتر لەگەڵ سووریا بڵاوەپێکردووە، ئەوانیش وەک لیژنەی ئاسایش و بەرگریی پشتیوانی ڕێکارەکانی حکومەتن.

 

وتیشی، "داوا دەکەین هەوڵی هەواڵگریی و سەربازیی زیاتر لەم قۆناغەدا بخرێنەکار بۆ پاراستنی ئاسایشی وڵات و ژیانی هاووڵاتییان، پێویستە بڕیاری ئاشتی و جەنگ تەنیا لەدەستی حکومەتدا بێت".