ئەڵمانیا دەیەوێت پێشمەرگە بكاتە هێزێكی مۆدێرن و تۆكمە

ئاڤا نیوز

 

ئەڵمانیا لە دروستكردنی هێزێكی مۆدێرن و تۆكمە، هاوكاری پێشمەرگەی كوردستان دەكات.

 

وێنە گەورەكە: جێگری سەرۆكی ئەركانی وەزارەتی پێشمەرگە، پێشوازی لە شاندێكی باڵای سوپای ئەڵمانیا كرد.

 

بابەتە ستراتیژییەکە: لە كۆبوونەوەی نێوان لیوا ڕوكن ڕێبوار عەلی كەریم، جێگری سەرۆکی ئەرکان بۆ ئۆپەراسیۆنەکان و کۆڵۆنێڵ ئەنتۆنیۆ، بەرپرسی پەیوەندییەکانی سوپای ئەڵمانیا لە هەرێمی کوردستان و تیمی یاوەری، باس لە ئۆپەراسیۆنەکان و چۆنیيەتی مەشقەکانی ئەفسەران كرا، لە چوارچێوەی بەڕێوەچوونی مەشقەکانی هێزی پێشمەرگەدا. هاوکات چۆنيەتی پەرەپێدانی پلان و هەنگاوەکانی ڕاهێنان بۆ ساڵی نوێی 2025 تاوتوێ كرا.

 

بۆچی گرنگە: ئەڵمانیا كە هاوبەشێكی سەرەكی هەرێمی كوردستانە بەتایبەتی لە شەڕی ڕووبەڕووبوونەوەی تیرۆر، مەبەستیەتی ئاستی زانستی و لێهاتوویی ئەفسەران و كارمەندانی وەزارەتی پێشمەرگە بەرزبكاتەوە و لەنێو ڕیزەكانی پێشمەرگە، هێزێكی مۆدێرن دروست بكات.

 

لێدوانی فەرمی: لیوا ڕوكن ڕێبوار عەلی كەریم، جێگری سەرۆکی ئەرکان بۆ ئۆپەراسیۆنەکان، سوپاسی هاوكارییە بەردەوامەكانی هێزەكانی هاوپەیمانانی كرد و داوای لە شاندە ئەڵمانیاكە كرد هاوكارییەكانیان لە داهاتووش بەردەوام بێت.

 

لەلایەکی دیکەوە: کۆڵۆنێڵ ئەنتۆنیۆ، بەرپرسی پەیوەندییەکانی سوپای ئەڵمانیا لە هەرێمی کوردستان، خواستی وڵاتەكەی بۆ دروستكردنی هێزێكی مۆدێرن و تۆكمە دووپات كردەوە.