خۆپیشاندانەکانی ئەمڕۆی ڕۆژئاوای کوردستان ژمارەیەک برینداری لێدەکەوێتەوە

ئاڤا نیوز

 

لە خۆپیشاندانەکانی ئەمڕۆی شاری ڕەقە لە ڕۆژئاوای کوردستان گرژی و ئاڵۆزی دروست بوو، ئاسایشی ناوخۆیی بەڕێوەبەرایەتیی خۆسەر لەوبارەیەوە ڕایگەیاند، لەناو خۆپیشاندەرانی شاری ڕەقە چەند کەسێک بەشێوەی هەڕەمەکی تەقەیان کردووە.

 

چیرۆکی سەرەکی: دوای ئەوەی بەڕێوەبەرایەتیی خۆسەر بڕیاری دا ئاڵای نوێی سووریا لەسەر هەموو فەرمانگە و دامەزراوەکان هەڵبکات، خەڵکی ڕەقە بۆ خۆشی دەربڕین و پێشوازیکردن لەو بڕیارە گردبوونەوە، بەڵام لەناو گردبوونەوەکەدا چەند کەسێک بەشێوەی هەڕەمەکی تەقەیان کردووە کە بەهۆیەوە چەند کارمەندێکی ئاسایش و ژمارەیەکی زۆر هاووڵاتی بریندار دەبن.

 

وێنە گەورەکە: چەند ڕۆژێکە هێرشی گرووپە چەکدارەکان بۆسەر هێزەکانی سووریای دیموکرات (هەسەدە) لە ڕۆژئاوای کوردستان بەردەوامە، بە تایبەت لە بەنداوی تشرین کە دەکەوێتە سەر ڕووباری فورات  و منبج و ڕەقە بەیەکەوە دەبەستێتەوە.

 

ڕاگەیێنراوی فەرمی: بەپێی ڕاگەیێنراوەکەی ئاسایشی ناوخۆیی خۆسەر، چەند کەسێک لەناو خۆپیشاندەران بە نیازی دروستکردنی ئاژاوە بوون و تەقەی هەڕەمەکییان کردووە، لە ئەنجامدا چەند کارمەندێکی ئاسایش و چەند هاووڵاتییەکی شاری ڕەقە بریندار بوون.

هاوکات، بەگوێرەی میدیاکانی نزیک لە هەسەدە، بەهۆی تەقەکردنەکەی ئەمڕۆ، 43 کەس لەناو هاووڵاتییانی شارەکە بریندار بوون.

زانیاریی زیاتر: ئەمشەو، ڕوانگەی سووری بۆ مافەکانی مرۆڤ چەند ڤیدیۆیەکی شاری ڕەقەیان بڵاوکردووەتەوە کە هێزێکی زۆری ئاسایش بەناو شارەکە دەسوڕێنەوە و قەدەغەی هاتوچۆیان لە شارەکە ڕاگەیاندووە.

 

باکگراوند: ساڵی 2014 ئەو کاتەی ڕێکخراوی داعش هیرشی کرد سووریا و عێراق، شاری ڕەقەی داگیرکرد، بەڵام دواتر هێزەکانی سووریای دیموکرات "هەسەدە" شارەکەیان لەژێر دەستی داعش دەرهێنا.