مەزڵوم عەبدی: دەمانەوێت سود لە ئەزموونی باشووری کوردستان وەربگرین

ئاڤا نیوز

 

فەرماندەی گشتیی هێزەکانی سووریای دیموکرات باس لەوە دەکات، کە دەیانەوێ سود لە ئەزموونی باشووری کوردستان لەگەڵ عێراق ببینن، لە سووریا ئەو ئەزموونە جێبەجێ بکەن.

 

وێنە گەورەکە: شەوی پێنجشەممە 12-12-2024، مەزڵوم عەبدی، فەرماندەی گشتیی هێزەکانی سووریای دیموکرات، لەمیانی دیدارێکی لە میدیای سەربە حزبەکەی باسی لە ئایندەی ڕۆژئاوای کوردستان لە چوارچێوەی سووریا کرد، هەروەها پرسی ئاگربەست و دانووستانەکانیان لەگەڵ شام تاوتوێ کرد.

 

لێدوانی فەرمی: مەزڵوم عەبدی، ڕایگەیاند: بەم نزیکانە دیالۆگی کورد و کورد دەستپێدەکاتەوە، بۆ ئێمە ئەزموونی باشووری کوردستان لەگەڵ عێراق باشە، بۆ ئەوەی لە سووریا جێبەجێی بکەین، داوا لە هەرێمی کوردستان دەکەم هاوکاریمان بکەن و خاوەنی هەڵوێست بن.

 

فەرماندەی گشتیی هێزەکانی سووریای دیموکرات ڕاشیگەیاند: ئێمە هەرێمەکەمان دەپارێزین، دەبێت کورد بە یەک هەڵوێست و بەهێزەوە بچێتە شام و لە چارەسەری کێشەکان پێکەوەبین، چونکە زیاتر لە هەر کاتێک پێویستە یەکگرتووبین.

 

مەزڵوم عەبدی ئەوەشی گوت: ئێمە بەشێکین لە سووریا و ئاڵای نوێی ئەم وڵاتە قبوڵ دەکەین، هیوادارین ئاگربەست ڕابگەیێنرێت، چونکە لە ڕۆژئاوای دێرەزوور ئامانجمان ڕاگرتن لە داعش بووە.