پارتی و یەکێتی بۆ کۆبوونەوە چاوەڕوانی یەکن

ئاڤا نیوز

 

دوای ئەنجامدانی یەکەمین کۆبوونەوەی نێوانیان، ئێستا پارتی و یەکێتی چاوەڕوانی یەکن بۆ ئەوەی جارێکی دیکە کۆببنەوە و گفتوگۆ لەبارەی پێکهێنانی کابینەی نوێی حکومەت بکەن. ئەندامێکی مەکتەبی سیاسی پارتیش دەڵێت، " چاوەڕوانی وەڵامی یەکێتین".

 

وێنە گەورەکە: ڕۆژی 30-11-2024، شاندی دانووستاندنکاری پارتی و یەکێتی لە دەباشان کۆبوونەوە، دوای کۆبوونەوەکە هەردوولا ڕایانگەیاند، کۆبوونەوەکە لە کەشێکی ئەرێنی دا بەڕێوەچوو و ئامادەیی خۆشیان بۆ درێژەدان بە کۆبوونەوەکانی نێوانیان بۆ گفتوگۆکردن لەسەر پێکهێنانی کابینەی نوێی حکومەت دەربڕی.

 

لێدوانی فەرمی: ئامینە زکری، ئەندامی مەکتەبی سیاسیی پارتی دیموکراتی کوردستان بە ئاڤای ڕاگەیاند: بۆ کۆبوونەوە و دانوستاندن چاوەڕێی وەڵامی یەکێتین، جەخت لەسەر ئەوە دەکەینەوە کە بنەمای پێکهێنانی حکومەت ئەنجامی هەڵبژاردن بێت.

بۆچوونی لایەنی بەرامبەر: لەبارەی دووەم کۆبوونەوەیان لەگەڵ پارتی، ئەندامێکی ئەنجوومەنی سەرکردایەتی یەکێتی بە ئاڤای گوت: یەکێتی ئامادەیە بۆ دانیشتن، ئێستا تۆپەکە لە ساحەی پارتییە و بۆ دانیشتن چاوەڕوانی ئەوانین.