پەیامێکی سوپاسگوزاری لە سەرۆک بارزانییەوە

 ئاڤا نیوز

 

سەرۆک بارزانی، پەیامێک بڵاودەکاتەوە و سوپاسی بەشداربووانی پرسەی زەکیا مستەفا بارزانی دەکات.

ئەوەی پێویستە بیزانیت: ڕۆژی هەینی 23-02-2024، خاتوو (زەکیا مستەفا بارزانی) دوای نەخۆشکەوتنی و مانەوەی لە نەخۆشخانەیەکی هەولێر، کۆچی دوایی کرد.

ڕاگەیێنراوی فەرمی: لە پەیامەکەی سەرۆک بارزانییدا هاتووە: بە ناوی خۆم و هەموو ئەندامانی خانەوادەی بارزانی، سوپاسی بێ پایانی خۆمان ئاراستەی بەرپرسانی فەرمی و حکوومی و حزبیەکانی عێراق و هەرێمی کوردستان، ئەندامانی ئەنجوومەنی نوێنەرانی عێراق و باڵیۆز و کونسوڵ و نوێنەری وڵاتان و ڕێکخراوە نێودەوڵەتییەکان و هێزی هاوپەیمانان و پیاوانی ئایینی و نوێنەری پێکهاتە نەتەوەیی و ئایینییەکان و سەرۆک و نوێنەری هۆزەکانی باشوور و ناوەڕاست و ڕۆژئاوای عێراق و نوێنەرانی ڕێکخراوەکانی کۆمەڵگەی مەدەنی و کەسایەتییە سیاسی و کۆمەڵایەتی و فەرهەنگيی و ئاکادیمی و وەرزشی و فەرماندە و هێزە قارەمانەکانی پێشمەرگە و دەزگا ئەمنیەکان و هێزەکانی ناوخۆ و بەرپرسانی ئیداری و سیاسی و ڕاگەیاندنکاران و هەموو چینوتوێژەکانی هەرێمی کوردستان و عێراق و سەرجەم کوردستانییانی ئازیز لە هەر چوار پارچە و دەرەوەی وڵات دەکەم، کە تەشریفیان هێناوە بۆ بەشداریکردن لە پرسەی خوشکی خوالێخۆشبوومان (زەکیا مستەفا بارزانی) و لە خەمی ئێمەیان کەم کردەوە.

 

زانیاریی زیاتر: سوپاسی هەموو ئەو سەرۆک و بەرپرس و کەسایەتیی وڵاتان و دۆستانی بیانی و هەموو ئەو بەڕێزانەی دەرەوە و ناوخۆی کوردستان و عێراق دەکەم، کە لە ڕێگەی تەلەفۆن و بروسکە و پەیامی سەرەخۆشی لە خەمی ئێمەدا شەریک بوونە.

"سوپاسی هاووڵاتیانی خۆشەویستی شارۆچکەی سەلاحەددین دەکەم کە لەو چەند ڕۆژەدا تەحەمولی زەحمەتی و قەرەباڵغیی پرسەکەیان کردووە و میوانداریی خەڵکیان کردووە. هەروەها سوپاسی ئەرک و ماندووبوونی هێزەکانی پێشمەرگە و دەزگا ئەمنییەکان و هێزەکانی ناوخۆ و تیمە تەندروستییەکان دەکەم کە ئەرکی ڕێکخستنی ڕێگەوبان و ئاسایش و ئاسانکاریان بۆ میوانان لەسەر شان بوو".