سبەی پارەی گەنمی جووتیاران دەگات

ئاڤا نیوز

 

وەزارەتی بازرگانی عێراق ڕەزامەندی داوە لەسەر خەرجکردنی دواین گوژمەی پارەی گەنمی جووتیاران، سبەی شەممە چەکی پارەکە دەگات و لەم هەفتەیە جووتیاران وەریدەگرن.

 

وێنە گەورەکە: ئەمساڵ لە پرۆسەی بە بازاڕکردنی گەنمی جووتیارانی عێراق، پشکی هەرێمی کوردستان تەنیا 700 هەزار تۆن گەنم بوو، لە کۆی 598 ملیار شایستەی جووتیارانی هەرێمی کوردستان لەماوەی ڕابردوودا بە چەند گوژمەیەک پارە نێردراوە، ئەوەی بەیانی دەگات دواین گوژمەیە.

لێدوانی فەرمی: هێمن سەید موراد، بەڕێوەبەری کشتوکاڵی هەولێر بە ئاڤا نیوزی ڕاگەیاند، دوێنێ پێنجشەممە وەزارەتی بازرگانی عێراق ڕەزامەندیدا لەسەر خەرجکردنی 143 ملیار دینار وەک دواین بڕی شایستەی جووتیارانی هەرێمی کوردستان، لەم بڕە 44 ملیار و 500 ملیۆنی پشکی جووتیارانی هەولێرە کە ژمارەیان 16 هەزار و 700 جووتیارە. 

 

زانیاریی زیاتر: "سبەی چەکی پارەکە دەگات و لە ناوەڕاستی ئەم هەفتەیە دەست بە دابەشکردنی دەکرێت، دوای ئەم هیچ جووتیارێک نامێنێت کە شایستەی ئەمساڵی وەرنەگرتبێت" هێمن سەید موراد ئەمەی وت.