بلومبێرگ: ڕووسیا و تەحریرولشام نزیکن لە ڕێککەوتن سەبارەت بە بنکە سەربازییەکان

ئاڤا نیوز

 

لەگەڵ نەمانی دەسەڵاتی ئەسەد، محەممەد جۆلانی ( ئەحمەد شەرع ) جموجووڵەکانی دەستپێکردووە بۆ گەڕاندنەوەی سووریا بۆ دۆخی ئاسایی خۆی، ئێستاش لەگەڵ ڕووسیا لە ڕێککەوتن نزیکن سەبارەت بە بنکە سەربازییەکان.

 

وێنە گەورەکە: ڕووسیا هاوپەیمانێکی گرنگی ڕژێمەکەی ئەسەد بوو و یارمەتیدەرێکی سەرەکی مانەوەی دەسەڵاتەکەی ئەسەد بوو لە ساڵانی ڕابردوو. لە دوای نەمانی ڕژێمی ئەسەدیش، ڕووسیا دەیەوێت لە سووریا بمێنێتەوە، ئەمەش لە ڕێگەی دوو بنکەی سەربازیی لە وڵاتەکە.

 

زانیارییە بەدەستهاتووەکان: ئاژانسی بلومبێرگ بڵاویکردووەتەوە، ڕووسیا نزیکە لە ڕێککەوتن لەگەڵ ئیدارە نوێیەکەی سووریا سەبارەت بە مانەوەی ‌هێزەکانی لە دوو بنکەی سەربازی، ئەوانیش بنکەی حمێمی ئاسمانی و بنکەی تەرتووسی دەریایین. هاوکات ڕووسیا مانەوەی هێزەکانی لە سووریا بە گرنگ دەزانێت لەبەر هۆکارە ستراتیژییەکانی.

 

لەلایەکی دیکەوە: چەند سەرچاوەیەک ئاماژە بەوە دەکەن کە وەزارەتی بەرگریی ڕووسیا پێیوایە لێکتێگەیشتنێک هەیە لەگەڵ گرووپی تەحریرولشام کە ڕێگە دەدات بە بەردەوامبوونی ڕووسیا لە سووریا، ئەمەش ئەگەری گۆڕانی هەیە بەهۆی ناسەقامگیریی وڵاتەکە. 

 

لێدوانی فەرمی: میخائێل بۆگدانۆف، جێگری وەزیری دەرەوەی ڕووسیا ڕایگەیاندووە، ڕووسیا پەیوەندی بە گرووپی تەحریرولشام کردووە بەو هیوایەی گرووپەکە نێردە دیبلۆماسییە بیانییەکان بپارێزێت لە وڵاتەکە. هاوکات دەڵێت ڕووسیا دەیەوێت بنکەکانی لە سووریا بمێنێتەوە بە هۆی ئەگەری سەرهەڵدانەوەی داعش.

 

ئەوەی ئێستا ڕوودەدات: لە هەندێک ناوچە ڕووسیا دەستیکردووە بە کشانەوەی هێزەکانی بەبێ ئەوەی هیچ ڕووبەڕووبوونەوەیەک ڕووبدات.