وەزیری بەرگریی ئیسرائیل: مانەوەمان لە سووریا کاتییە

ئاڤا نیوز

 

دوای ئەوەی سوپای ئیسرائیل بە قوڵایی چەند کیلۆمەترێک چووە ناو خاکی سووریا، وەزیری بەرگریی لەوبارەیەوە ڕایگەیاند، مانەوەیان لەو وڵاتە کاتییە.

 

وێنە گەورەكە: سوپای ئیسرائیل لە 7ـی ئەم مانگەوە هێرشی كردە سەر ناوچەكانی دەوروبەری چیای حرمۆن لە باشووری سووریا و، هێزەكانیان چوونە ئەو شوێنە و ئێستا بەشێك لە هێزەكانی لێ جێگیر كردووە.

 

لێدوانی فەرمی: ئیسرائیل کاتز، وەزیری بەرگریی ئیسرائیل ڕایگەیاند، فەرمانی دەرکردووە سوپای وڵاتەکەی لە مانگەکانی زستاندا لە ناوچەكانی دەوروبەری چیای حرمۆن بمێننەوە.

 

زانیاریی زیاتر: وەزیری بەرگریی ئیسرائیل ئاماژەی بەوەشكردووە مانەوەی هێزەكانیان لە چیای حرمۆن كاتی دەبێت تاوەكو دڵنیایی ئەمنیەتی سنوورەكانی ئیسرائیل بكات.

 

ئەوەی پێویستە بیزانیت: چیای حرمۆن زیاتر لە دووهەزار مەتر لە ئاستی ڕووی دەریاوە بەرزە و بەسەر هەر سێ وڵاتی سووریا، لوبنان و ئیسرائیل دەڕوانێت، بەهۆی هەڵكەوتە جوگرافییە ستراتیژییەكەی بەردەوام جێی بایەخی ئیسرائیل بووە.