شارەوانیی هەولێر: 50 هەزار پارچە زەوی ئامادەن تاوەکو بەسەر فەرمانبەران دابەش بکرێن

ئاڤا نیوز

 

سەرۆكی شارەوانیی هەولێر، نوێترین زانیاری سەبارەت بە پرۆسەی دابەشكردنی زەوی بەسەر فەرمانبەران لە سنووری هەولێر ئاشكرا دەكات و دەڵێت، 50 هەزار زەوی نەخشەی کەرتییان ئامادەکراوە بۆ ئەوەی بەسەر فەرمانبەراندا دابەش بکرێن.

 

لێدوانی فەرمی: كارزان هادی، سەرۆكی شارەوانیی هەولێر بە ئاڤای ڕاگەیاند: تاوەكو ئێستا لە سنووری سەرۆكایەتیی شارەوانیی هەولێر سێ هەزار زەوی بەسەر فەرمانبەران دابەش كراون، ئەوانەشی سوودمەند بوونە فەرمانبەرانی وەزارەتەكانی پلاندانان و شارەوانی و پەرلەمانی كوردستانن.

 

سەرۆكی شارەوانیی هەولێر ڕاشیگەیاند: فەرمانبەرانمان تاوەكو 9ی شەو لە سەرۆكایەتیی شارەوانی دەمێننەوە و بەردەوام كار لە پرۆسەكە دەكەن و وردبینیی ناوەكان دەكەن، هەروەها پرۆسەی دابەشكردنی زەوی بەردەوامە.

 

لەلایەكی دیكەوە: بەگوتەی سەرۆكی شارەوانیی هەولێر، بە هەماهەنگی لەگەڵ بەڕێوەبەرایەتیی نەخشەدانانی ئاوەدانی كاركردن بۆ دانانی نەخشەی كەرتیی لەسەر ئەو زەوییانە بەردەوامە كە لە داهاتوودا دەدرێن بە فەرمانبەران، ئێستا نزیكەی 50 هەزار زەوی نەخشەی كەرتییان بۆ ئامادە كراوە و هاوكات لەگەڵ ئەوەش ڕێككارە یاساییەكان بۆ كوژاندنەوەی زەوییەكان بەردەوامن.