ئەمشەو کۆتایی بە پرۆسەی سەرژمێری گشتیی دانیشتوان دەهێنرێت

ئاڤا نیوز

 

بڕیارە کاتژمێر 12ـی ئەمشەو وەزارەتی پلاندانانی حکومەتی هەرێمی کوردستان، کۆتایی هاتنی پرۆسەی سەرژمێری گشتیی دانیشتوان ڕابگەیێنت.

 

چیرۆکی سەرەکی: پرۆسەی سەرژمێری گشتیی دانیشتووان لە عێراق و هەرێمی کوردستان لە ڕێککەوتی 20-11-2024 دەستپێکرد و بە سێ قۆناغ پرۆسەکە بەرێوەچوو. هاووڵاتییان بە مەبەستی بەشداریکردن لەو پرۆسەیە بە گەرموگوڕییەوە پێشوازییان لێکردم بەتایبەت ئەوانەی هاووڵاتی سنووری ماددەی 140 بوون، بەڵام لە شارەکانی دیکەی هەرێمی کوردستان دەژیان، هەمووان گەڕانەوە شوێنی ڕەسەنی خۆیان و بەشدارییان لە سەرژمێرییەکە کرد.

ڕاگەیێنراوی فەرمی: وەزارەتی پلاندانانی حکومەتی هەرێمی کوردستان، ڕایگەیاند: سەرەرای بوونی ئاستەنگی دارایی، تەکنیکی، هونەری و کەمی کات لەبەردەممان، بۆ ئامادەکاری و جێبەجێکردنی پرۆسەی سەرژمێری گشتیی دانیشتوان لە هەرێمی کوردستان و ناوچە کورستانیەکانی دەرەوەی ئیدارەی هەرێمی کوردستان، توانرا ئەم پرۆسە گەورە و گرنگە بە باشترین شێوە بە ڕێوەبچێت.

وەزارەتی پلاندانان ئاماژە بەوەش دەکات، "کاتژمێر 12ـی ئەم شەو هاوڵاتییان لە کۆتا پرۆسەکە ئاگادار دەکەینەوە و کۆتایی هاتنی پرۆسەی سەرژمێری ڕادەگەێنین". 

 

زانیاریی زیاتر: ڕاگەیاندنی ئەنجامی کۆتایی سەرژمێری چەند مانگێکی پێویستە، بەڵام لەوانەیە مانگی دوو بەشێوەیەکی سەرەتایی هەندێ ئەنجام بڵاوبکرێتەوە.