هەسەدە: تورکیا بە بیانووی گۆڕی سلێمان شا دەیەوێت ئاگربەست بشکێنرێت

ئاڤا نیوز

 

سێ ڕۆژ پێش ئێستا، بەناوبژیوانی ئەمریکا، ڕێککەوتنێک لە نێوان هەسەدە و گرووپە چەکدارەکانی نزیک لە تورکیا واژۆکرا بەوەی کە هەسەدە هێزەکانی خۆی لە منبج بکشێنێتەوە، لە بەرامبەدا چەکدارەکانی نزیک لە تورکیا هێرشەکانیان بۆ سەر کۆبانێ و هەسەدە ڕابگرن، بەڵام چەکدارەکان هێرشەکانیان دەستپێکردووەتەوە.

 

لێدوانی فەرمی: سەرچاوەیەک لە هەسەدە با ئاڤا نیوزی گوت: ئەمڕۆ شەممە، چەکدارەکانی نزیک لە تورکیا پەیامیان بە هەسەدە داوە کە دەبێت چەند کیلۆمەترێک لە ڕۆژئاوای کۆبانێ چۆڵ بکەن و ئەوان شوێنیان بگرنەوە، بەڵام هەسەدە ئەوەی ڕەتکردووەتەوە.

 

سەرچاوەکەی هەسەدە دەڵێت: دوای ڕەتکرنەوەی داواکاری چەکدارەکانی نزیک لە تورکیا لەلایەن هەسەدەوە، چەکدارەکان بە ئەمریکییەکانیان گووتووە ئەوان دەیانەوێت "گۆڕی سڵێمان شا" بکەنە بنکەی سەربازی، بەڵام بە تووندی داواکاریەکەیان ڕەتکراوەتەوە.

 

لەلایەکی دیکەوە: هۆشەنگ دەروێش، نوێنەری ئەنجوومەنی سووریای دیموکرات لەوبارەیەوە بە ئاڤا نیوزی گوت: تورکیا زۆر لەم گۆڕانکارییانەی سووریا دەترسێت کە هەژموونی خۆی لەو وڵاتە لە دەست بدات، لەبەر ئەوەی کوردانی ڕۆژئاوا ئێستا پشتگیرییەکی بەهێزیان هەیە و تورکیاش لەوە دەترسێت.

 

قووڵتر: لەبەرئەوەی ئەمریکا و هاوپەیمانان پشتگیری هەسەدە دەکەن، تورکیا دەیەوێت بە چەکدارەکانی نزیک لە خۆی هێرش بکات و ئاڵۆزی نوێ دروست بکاتەوە. 

ئەوەی پێویستە بیزانیت: پێشتر مەزڵووم عەبدی، فەرماندەی گشتیی هێزەکانی سووریای دیموکرات ڕایگەیاند: ئامادەن هاوکاری تورکیا بکەن بۆ گواستنەوەی گۆڕی سڵێمان شا بۆ وڵاتەکەیان ئەگەر خۆیان بیانەوێت.

 

باکگراوند: لە شووباتی 2015ـەوە بەهۆی هەڕەشەی داعش، سوپای توركیا بە هاوكاری یەپەگە گۆڕی (پادشا سڵێمان)ـی لە ناوچەی پردی قەرەقوزاقەوە لە باشووری كۆبانێ گواستەوە بۆ گوندی ئاشمە کە 20 كیلۆمەتر لە ڕۆژئاوای كۆبانێوە دوورە و نزیكە لە سنووری توركیا.