ماستەرپلانی شاری کەرکووک ڕادەگەیێنرێت

ئاڤا نیوز

 

ئیدارەی پارێزگای کەرکووک ماستەرپلانی نوێی شارەکەی ڕاگەیاند و بەپێی چەند قۆناغێک جێبەجێ دەکرێت، لەو ڕێگەیەوە گرفتی کەمی خزمەتگوزاری بۆ گەڕەکە کوردنشینەکان چارەسەر دەکرێت و ڕێژەی سەوزاییش بەشێوەیەکی بەرچاو زیاد دەکرێت.

 

وێنە گەورەکە: دوای 19ساڵ ، ئیدارەی پارێزگای کەرکووک، ماستەر پلانی نوێی ڕاگەیاند کە خۆی لە چەند قۆناغێکدا دەبینێتەوە، دیارترینیان ڕێکخستنەوەی باڵەخانەی فەرمانگەکان و گەیاندنی خزمەتگوزارییە بۆ گەڕەکە زیادەڕەوەکان، جگە لەوەش بەرزکردنەوەی ڕێژەی سەوزایی لە سەدا یەکەوە بۆ لە سەدا 15.

 

لێدوانی فەرمی: قاسم ئیبراهیم حافز ، جێگری پارێزگاری کەرکووک دەڵێت:

- 12 ساڵ پێش ئێستا دەست کرا بە نوێکردنەوەی پرۆژەی ماستەر پلانی شارەکە، بەڵام ئەوکاتە بە هۆی ناکۆکی سیاسی، پڕۆژەکە نەچووە بواری جێبەجێکردنەوە.

 

- لە پارێزگای کەرکووک 7 گەڕەکی کوردنشین لە دوای پرۆسەی ئازادی عێراق دروست کراون، ئەو گەڕەکانە لە سەردەمی ئیدارەی پێشوودا بە بیانوی زیادەڕەوی کەمترین خزمەتگوزارییان بۆ ڕۆیشتووە، ئێستاش دیار نیە و کێشەی کەمی خزمەتگوزارییان بەردەوامە.

 

 

- دانیشتوانی کەرکووک زیاتر لە ملیۆنێک و 200 هەزار کەسە، بۆیە پێویستە ماستەرپلانێکی نوێی بۆ دابنێین، تاوەکو پرۆژەی خزمەتگوزاری و ڕێکخستنی ڕێگاو بانەکان چاک بکەین، بەمزووانە پرۆژەکە دەچێتە بواری جێبەجێکردنەوە.

 

لەلایەکی دیکەوە: هاووڵاتی، ئەحمەد کە دانیشتووی گەڕەکی 50 عەلییە، دەڵێت: گەڕەکەکەمان بێ خزمەتگوزارییە و چاومان لەوەیە کە لە ماستەر پلانی نێوی ئیدارەی شارەکەدا خزمەتگوزاریمان پێ بگات.