وەزارەتی ناوخۆ: هەرکەسێک مامەڵە بە سیمکارتی "علوج" بکات سزا دەدرێت

ئاڤا نیوز 

 

وەزارەتی ناوخۆی هەرێمی کوردستان، ڕێککاری توند بۆ مامەڵەکردن بە سیمکارتی تۆمارنەکراو (علوج) و بێ مۆڵەت دەگرێتەبەر، بەڕێوەبەری دیوانی وەزارەتی ناوخۆ لەوبارەیەوە دەڵێت، 'هەموو شوێنەکان ئاگادارکردنەوەیان پێ دەدرێت و واژۆیان لێ وەردەگیرێت'.

 

وێنە گەورەکە: ئەمڕۆ دووشەممە، بەڕێوەبەری دیوانی وەزارەتی ناوخۆ و نوێنەری وەزارەتی گواستنەوە و گەیاندن لەگەڵ نوێنەری کۆمپانیاکانیا ڕێگەپێدراوەکانی موبایل و ئەنتەرنێت لەبارەی کۆنترۆڵکردنی سیمکارتی تۆمارنەکراو و بێ مۆڵەت کۆبوونەوە.

 

لێدوانی فەرمی: د.هێمن میرانی، بەڕێوەبەری دیوانی وەزارەتی ناوخۆی حکومەتی هەرێمی کوردستان، بە ئاڤا نیوزی ڕاگەیاند: هاووڵاتیان دەبێ هۆشیاربن مامەڵە بە سیمکارتی بێ مۆڵەت و تۆمارنەکراو نەکەن و سیمکارتی خۆیان نەفرۆشن، بۆ ئەوەی لە کاتی تاوان لەلایەن هێزە ئەمنییەکانەوە توشی کێشە نەبن.

 

ئەوەشی خستەڕوو کە فرۆشیارانی مۆبایل کە مامەڵە بە سیمکارت دەکەن، ئەگەر بریکار و تۆمارکراو نەبن، پێویستە واز لەو کارە بهبێنن، هەر کەسێک پابەند نەبێت بە بڕی سێ ملیۆن دینار پێبژاردن (غەرامە) دەکرێت.

 

زانیاری زیاتر: بەگوێرەی ڕێنمای ژمارە 8ی ساڵی 2021 و ڕێنمای ژمارە 9ی ساڵی 2022 بەکارهێنانی سیمکارتی بێ مۆڵەت و تۆمارنەکراو قەدەغەیە.

 

ئەوەی پێویستە بیزانیت: لەمەولا بەڕێوەبەری کاروباری ناوخۆی پارێزگا و ئیدارە سەربەخۆکان سەردانی بازاڕەکان دەکەن، هەر دوکاندارێک کە مامەڵە بە سیمکارت بکات، ئاگادارکردنەوەی پێ دەدرێت و واژۆی لێ وەردەگیرێت.