بە ئامادەبوونی سەرۆكوەزیران بارزانی ڕێوڕەسمی ڕۆژی نیشتمانیی قەتەر بەڕێوەچوو

ئاڤا نیوز

 

بە ئامادەبوونی سەرۆكوەزیران مەسرور بارزانی و ژمارەیەك لە بەرپرسانی حكومی و حیزبی، لە شاری هەولێر ڕێوڕەسمی ڕۆژی نیشتمانیی قەتەر بەڕێوەچوو.

 

وێنە گەورەكە: 18-12ی هەموو ساڵێك ڕۆژی نیشتمانیی وڵاتی قەتەرە، قەتە یەكێكە لەو وڵاتانەی پەیوەندیی لەمێژینەی لەگەڵ هەرێمی كوردستان هەیە و نزیكەی ساڵێكە بە فەرمی كونسوڵخانەی خۆی لە شاری هەولێر كردووەتەوە و ئێستا پەیوەندییەكانی نێوان هەرێمی كوردستان و قەتەر لە ئاستێكی باڵادایە.

لێدوانی فەرمی: حوسێن بن عەلی، كونسوڵی گشتیی قەتەر لە هەولێر لە ڕێوڕەسمەكەدا، ڕایگەیاند: شانازیی بە وڵاتەكەمان دەكەین كە ئێستا لەسەر نەخشەی جیهان ناوێكی دیارە لە بوارەكانی سیاسی و ئابووری، بە خۆشحاڵییەوە پەیوەندییەكانمان لەگەڵ هەرێمی كوردستان لە ئاستێكی بەرزدایە بەتایبەت لە بواری دیپلۆماسی و ئابووری، هەر بۆیە بڕیاری كردنەوەی كونسوڵخانەی گشتیی وڵاتەكەمان لە هەرێمی كوردستان دا. هاوکات سەردانی بەرپرسانی هەردوولا لەچوارچێوەی پەیوەندییە دیپلۆماسییەکانمان بەردەوامە.

 

لەلایەكی دیكەوە: سەفین دزەیی، بەرپرسی فەرمانگەی پەیوەندییەكانی دەرەوەی هەرێمی كوردستان لە وتارێكیدا لە ڕێوڕەسمەكەدا پیرۆزبایی حكومەتی هەرێمی كوردستانی ئاراستەی هاووڵاتیان و حكومەتی وڵاتی قەتەر كرد و ڕایگەیاند: قەتەر پێشكەوتنی خێڕای بەخۆیەوە بینیوە و سیاسەتی هەرێمی كوردستان كراوەیە بە دونیای دەرەوە، پەیوەندییەكانمان لەگەڵ وڵاتی قەتەر بەهێزە و بەردەوامە و لە ئاستێكی بەرزدایە.