وەزیری دارایی: لە هەفتەیەکدا سەرجەم داواکارییەکانی بەغدا لەبارەی مووچە جێبەجێ دەکەین

وەزیری دارایی حكومەتی هەرێمی كوردستان ڕایگەیاند، بەڕێوبەرایەتی گشتیی ژمێرکاری و گەنجینەکان و سەرجەم یەکە ژمێریارییەکان ڕاسپێردراون لە ماوەی کەمتر لە هەفتەیەکدا سەرجەم گرفتەكانی مووچە چارەسەر بكەن.

 

وێنە گەورەكە: ڕۆژی سێشەممە 17-12-2024 ئاوات شێخ جەناب، وەزیری دارایی و ئابووریی حکومەتی هەرێمی کوردستان لەگەڵ شاندێکی تەکنیکیی وەزارەتی دارایی عێراق کە ماوەی دوو ڕۆژە بە سەردانێکی فەرمی لە هەرێمی کوردستانن، كۆبووەوە.

     
ڕاگەیێنراوی فەرمی: بەپێی ڕاگەیێنراوێكی وەزارەتی دارایی، ئاوات شێخ جەناب، وەزیری دارایی بە شاندەكەی ڕاگەیاند: لەپێناو چارەسەرکردنی سەرجەم کێشە تەکنیکییەکانی تایبەت بە مووچە و جێبەجێکردنی داواکارییە نوێیەکانی وەزارەتی دارایی عێراق لەسەر ڕێکخستنەوەی ڕاپۆرتەکانی تەرازووی پێداچوونەوەی مانگانە، بەڕێوبەرایەتیی گشتیی ژمێرکاری و گەنجینەکان و سەرجەم یەکە ژمێریاریەکان ڕاسپێردراون لە ماوەی کەمتر لەهەفتەیەکدا سەرجەم کارەکان تەواو بکەن.

  

لەلایەكی دیكەوە: لە دیدارەكەیان لەگەڵ وەزیری دارایی هەرێمی كوردستان، تیمی تەکنیکیی وەزارەتی دارایی عێراق  ڕایانگەیاند: وەک یەک تیم لەگەڵ بەڕێوبەرایەتیی گشتیی ژمێرکاری لە وەزارەتی دارایی کار دەکەن بۆ ئەوەی لەو ماوەی بۆیان دیاریکراوە کارەکان بەسەرکەوتوویی تەواو بکەن.

 

باكگراوند: ڕۆژی 15-12-2024شاندی حكومەتی هەرێمی كوردستان و وەزارەتی دارایی عێراق لە بەغدا كۆبوونەوە، لەسەر ڕاسپاردەی تەیف سامی ڕۆژی 16-12-2024 شاندێكی تەكنیكی بەغدا گەیشتە هەولێر و سێ ڕۆژە چەندین كۆبوونەوەیان لەگەڵ ژمارەیەك بەڕێوەبەرایەتیی و بەشی وەزارەتی داراییی و ئابووریی هەرێمی كوردستان ئەنجامداوە، شاندەكەی بەغدا سەرقاڵی تاوتوێکردنی چەند کێشەیەکی تەکنیکین لە بواری بودجە و مووچە، بڕیاریشە ماوەی هەفتەیەك لە هەرێمی كوردستان بمێننەوە.