بکوژی فەرماندە باڵاکەی ڕووسیا دەستگیر دەکرێت

ئاڤا نیوز

 

دەزگای ئاسایشی فیدراڵی ڕووسیا دەستگیرکردنی ئەنجامدەری تەقینەوەکەی مۆسکۆ کە بووە هۆی کوژرانی بەرپرسێکی باڵای رووسیا ڕاگەیاند.

 

وێنە گەورەکە: ڕۆژی سێشەممە 2024\17\12 بەهۆی تەقینەوەیەک لە مۆسکۆی پایتەختی ڕووسیا دووکەس کوژران کە یەکێکیان بەرپرسێکی باڵای سەربازیی ڕووسیا بوو.

 

ڕاگەیێنراوی فەرمی: دەزگای ئاسایشی فیدراڵی ڕووسیا ڕایگەیاند، "ئەنجامدەری ئەو هێرشە تیرۆریستییەی بووە هۆی کوژرانی ئیگۆر کیریلۆڤ، فەرماندەی هێزەکانی بەرگریی ئەتۆمی، کیمیایی و بایۆلۆجیی سوپای ڕووسیامان دەستگیر کرد".

 

زانیاریی زیاتر: دەزگاکە لە ڕاگەیێندراوێکدا ئاماژەی بەوە کردووە، بکەری ئەو هێرشە تیرۆریستییە، هاووڵاتیەکی ئۆزپاکستانییە و لە دایکبووی ساڵی 1995ـە. ئەوەشی خستووەتەڕوو، ئەو بۆمبێکی چێندراوی لە نزیک باڵەخانەیەکی نیشتەجێبوون لە ناوچەی شەقامی ڕیازان لە مۆسکۆ تەقاندووەتەوە کە دواتر بووەتە هۆی کوژرانی فەرماندەکەی سوپای ڕووسیا.

 

ئەوەی پێویستە بیزانیت:  بە چەند کاتژمێرێک دوای ڕووداوەکە ئۆکراینا بەرپرسیارییەتی خۆی لە کوشتنی ئەو بەرپرسە سەربازییەی ڕووسیا ڕاگەیاند.