دوو سیناتۆری ئەمریکی هەڕەشەی سەپاندنی سزا بەسەر تورکیا دەکەن

ئاڤا نیوز

 

دوو سیناتۆری ئەمریکی هەڕەشەی سەپاندنی سزا بەسەر تورکیادا دەکەن، ئەگەر ئەنقەرە ئاگربەست لەگەڵ کوردانی سووریا ڕانەگەیێنێت.

 

ڕاگەیێنراوی فەرمی: هەردوو سیناتۆر، کریس ڤان هۆڵین و لیندسی گراهام لە تۆڕی کۆمەڵایەتی ئێکس ڕایانگەیاندووە: "ئەم هەفتەیە پرۆژە یاسایەک بۆ سەپاندنی سزا بەسەر تورکیادا ئامادە دەکەین، ئەگەر بێتو ئەنقەرە پێشنیازی ئاگربەستی ئەمەریکا لەگەڵ هێزەکانی سووریای دیموکرات ڕازی نەبێت."

ئەوەی پێویستە بیزانیت: ڕۆژی  سێشەممە 2024\18\12، مەزڵوم عەبدی فەرماندەی هێزەکانی سووریای دیموکرات "هەسەدە"، لە هەژماری خۆی لەتۆڕی کۆمەڵایەتیی ئێکس ڕایگەیاند: "پابەندبوونی پتەومان بۆ بەدیهێنانی ئاگربەستێکی هەمەلایەنە لەسەرتاسەری سووریا هەیە، له‌و ڕووه‌شه‌وه‌ ئامادەیی خۆمان نیشانده‌ده‌ین بۆ دامەزراندنی ناوچەیەکی لەچەک داماڵراو لەشاری کۆبانێ، ئامانجیش له‌م ده‌ستپێشخه‌رییه‌، بۆ چارەسه‌رکردنی نیگەرانییە ئەمنییەکانی تورکیایە".

 

لەلایەکی دیکە: ئەم لێدوانەی ئەو دوو سیناتۆرە ئەمریکییە لە کاتێکدایە دوێنێ وەزارەتی دەرەوەی ئەمریکا ڕایگەیاند، ئاگربەست بەشێوەیەکی کاتیی لە نێوان هێزەکانی سووریای دیموکرات و گرووپەکانی سەر بە تورکیا لە منبج درێژکراوەتەوە و شەڕ و پێکدادان لە نێوانیاندا ڕوونادات.