یەکێتیی ئەوروپا لە بارەی ئۆکراینا کۆدەبێتەوە

ئاڤا نیوز

 

یەکێتیی ئەوروپا دانیشتنێکی تایبەت لە بارەی ئۆکرایناوە بە بەشداری ڤلۆدیمێر زێلێنسکی، سەرۆکی ئۆکراینا پێش دەستبەکاربوونی ترەمپ وەک سەرۆکی نوێی ئەمریکا ئەنجامدەدات.

 

وێنە گەورەکە: بۆ هاوکاریکردنی ئۆکراینا و تاوتوێکردنی دۆخی ئەو وڵاتە و بەرەوپێشچوونی شەڕ لە بەرەکانی پێشەوەی شەڕ لەنێوان ئۆکراینا و ڕووسیا، هاوکات ئەگەری ڕاگرنتی هاوکارییەکانی ئەمریکا بۆ کیێڤ، یەکێتی ئەوروپا کۆدەبێتەوە و زێلێنسکیش بەشداری لە کۆبونەوەکەدا دەکات.

 

لێدوانی فەرمی: جۆرجیا مێلۆنی، سەرۆکوەزیرانی ئیتاڵیا ڕایگەیاند:" ئەم لووتکەیە دەرفەتێک دەبێت بۆ تاوتوێکردنی "هەنگاوەکانی داهاتوو" دوای زیاتر لە هەزار ڕۆژ شەڕ لە ئۆکراینا.

 

زانیاریی زیاتر: بڕیارە جگە لە میلۆنی، ئیمانوێل ماکرۆن، سەرۆکی فەرەنسا، دۆناڵد توسک، سەرۆکوەزیرانی پۆڵەندا، ئۆلاف شۆڵز، ڕاوێژکاری ئەڵمانیا، دەیڤید لامی، وەزیری دەرەوەی بەریتانیا، ئورسولا ڤۆن دێر لیین، سەرۆکی کۆمیسیۆنی ئەوروپا و ئەنتۆنیۆ کۆستا، سەرۆکی ئەنجوومەنی ئەوروپا بەشداری لەم کۆبوونەوەیەدا بکەن.

 

بۆچی گرنگە: ئەوروپییەکان ترسیان لە ئەگەری ڕاگرتنی هاوکارییە سەربازییەکانی ئەمریکا بۆ ئۆکراینا هەیە، بەتایبەتی بەڵێنەکانی دۆناڵد ترەمپ، سەرۆکی هەڵبژێردراوی ئەمریکا بۆ کۆتاییهێنان بە شەڕەکە "لە ماوەی 24 کاتژمێردا".