بۆیەکەمجار نەتانیاهۆ چووە ناو خاکی سووریا

ئاڤا نیوز

 

سەرۆکوەزیرانی ئیسرائیل و تیمی ئەنجوومەنی ئاسایشی وڵاتەکەی چوونە سەر لووتکەی چیای هێرمۆن " جەبەل شێخ" کە کەوتووەتە سەر سنووری باشووری سووریا و ئیسرائیل،  ئەمەش دوای ئەوەی هەفتەی پێشوو ئیسرائیل کۆنترۆڵی کرد. نەتانیاهۆ لەسەر لوتکەی چیاکە ڕایگەیاند: "سەربازانی ئیسرائیل لەو شاخە دەمێننەوە".

 

زانیاریی بەدەستهاتوو: نەتەنیاهۆ کۆبوونەوەی ئەنجوومەنی ئاسایشی وڵاتەکەی لەسەر لووتکەی چیاکە بە ئامادەبوونی وەزیری بەرگریی و بەرپرسی دەزگایی هەواڵگری سەربازیی ئیسرائیل ئەنجامدا.

 

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل ڕایگەیاند:" سەربازانی ئیسرائیلی لەسەر ئەو چیا ستراتیژییە دەمێننەوە تا ئەوکاتەی رێگەیەکی نوێ دەدۆزرێتەوە بۆ پرسی ناوچەی لە چەک داماڵدراوی نێوان سووریا و ئیسرائیل کە لە ساڵی 1974وە ڕێککەوتنی ئاگربەستیان لەسەر کردووە".  ئەمە لە کاتێکدایە پێشتر نەتانیاهۆ وتبووی بە شێوەیەکی کاتی لە ناو خاکی سووریا دەمێننەوە، بەڵام لێدوانەکەی ئەمڕۆی پێچەوانەی لێدوانەکانی پێشوویەتی.

 

ئەوەی پێویستە بیزانیت: ئەم لووتکەیە بۆ ئیسرائیل زۆر گرنگە، بەجۆرێک لووتکەکە دەڕوانێت بەسەر خاکی ئیسڕائیل و تەواوی سووریا و ناوچەکەدا. هەر هێزێکیش لەو شوێنەدا بمێنێتەوە دەتوانێت بە تەواوەتی چاودێری ناوچەکە بکات.
 
بۆچوونی لایەنی بەرامبەر: تائێستا دەسەڵاتدارانی سووریا لەسەر سەردانەکەی نەتانیاهۆ بۆ سەر لوتکەکە هیچیان نەوتووە، بەڵام تورکیا سەرکۆنەی ئەو جموجۆڵەی ئیسرائیلی کرد و ئەو هەنگاوەی بە هەڵە زانی کە ئیسرائیل سەرقاڵی فراوانکردنی سنووری وڵاتەکەیەتی.